Pa partido ReD ta dificil acepta cu ta sigui mata pueblo cu belasting

Julie De Cuba RED

Pueblo mi ta bay comparti cu boso algo cu ta primi riba mi curason. Mi no ta un experto financiero ni un economista. Pero mi curason ta bati pa esnan abusa. Y mi ta uza mi common sense. Mi ta deduciendo cu tur empleado local ta un esclavo moderno cu ta sufri bao abuso. Sin duda. Poco tempo pasa boso a tende sr. Eman cuminsa papia di SIDS (Small Island Developing States) berdad? Ta un tema cu den mi cas nos ta toca pa aña nan largo caba. Islanan ta limita dor di nan espacio chikito pa alcansa nan metanan economico, social y medio ambiental. Dificil pa nan yega na un desaroyo sostenibel. Mayoria isla ta biba di turismo.

Dor di nan size nan tin poco opcion pa diversifica nan economia. Nan no tin un volumen di exportacion relevante tampoco y nan ta hopi vulnerabel pa desasternan natural. Ta comprendibel cu nan tin cu lucha pa haya inversionista. E pensamento di paisnan grandi ta cu economianan chikito manera esun di Aruba tin mester di inversion a base di partnership basa riba respet mutuo y beneficio mutuo. Ta un di e poco opcionnan financiero innovativo na nan disposicion ya cu nan no por fia placa riba mercado internacional dor cu nan ta rate nan como “high risk”. Ademas cu nan falta data economico y financiero actualisa. Y hopi ta wordo considera di ta “tax havens” cu ta un label hopi negativo. Y ta akinan ta caminda cu e rabo di porco ta krul. Aruba ta un “tax haven”, un paraiso fiscal pa inversionistanan di afo.

Contrario na otro islanan Aruba si por fia placa riba mercado internacional na interes hopi abao via Hulanda. Aruba tin infrastructura adecuado. E tin datanan actual. Y tambe e tin su beachnan, lama, solo y e servicio y amabilidad di su hendenan. Ta papia varios idioma y te ainda ta basta safe. Y no ta situa den e zona di horcan. Esakinan mester ta suficiente motibo pa cadenanan di hotel bin establece akinan. Pakico anto e necesidad pa haci di Aruba un paraiso fiscal pa hotelnan? Ora cu corporacionnan grandi y personanan rico haci uzo di paraisonan fiscal pa evadi paga belasting, e ta un abuso contra e sistema fiscal di nan pais y tambe di nos pais. Claro cu e culpabel ta nos gobiernonan. Cu ta permiti cu nos recursonan natural, nos infrastructura, nos forsa laboral y nos caha di gobierno ta wordo abusa. Pasobra hotelnan ta paga practicamente nada pa uzo di nos isla den forma di belasting. Lo mas cu hotelnan ta paga ta 2% di riba ganashi. Roomtax ta e turista ta paga. Y esey ta bay directamente den caha di ATA. Casinonan ta paga un license fee fiho di AWG5000 pa luna y 4% di winstbelasting. Mientras nos companianan local ta paga 28% di winstbelasting.

E cobransa pa locual cu a keda sin cobra na belasting di esunnan poderoso cu ta uza nos isla pa bira mas rico ta wordo presenta na nos, e clase trahado y companianan local. Nos tin cu scupi placa di belasting pa e aparato gubernamental por sigui draai. Y ni cuanto belasting nan squeeze for di nos, nunca e lo por ta suficiente. E rapport di CAFT mes tambe ta indica esey. Gobierno a bin cu PPP proyectonan cu no ta pa beneficio mutuo. Net e companianan cu ta bid mas halto ta haya proyectonan. Pa pueblo di Aruba no tin beneficio. Pasobra nos debe nacional ta sigui crece di forma monstruoso. Gobierno ta sigui hinca nos den un abismo financiero y ta sigui fia placa pa paga debe y pa paga salario di ambtenaar y paga bijdrage na AZV cu ta suppose di wordo paga cu placa di belasting. Anto ta keda sin paga debenan local. Mientras doñonan di hotel y casino ta gana placa na granel. Di nos mes hendenan tambe cu ta bicia na casino. Anto hotelnan ta durf di manda siguridad pa bo pa no subi riba “nan” beach. Internacionalmente ta conoci cu Aruba ta e pais caminda e tarifa di inkomstenbelasting ta esun mas halto di mundo. Pa e pagado di belasting casa e tarifa top ta 55.85% y pa soltero e ta 58.95%.

Bisa mi si nos como pueblo di Aruba (SIDS) no ta wordo abusa y si nos isla no ta wordo prostitui! Esaki no por sigui. No mas. Ta p’esey partido ReD ta studiando e modelo di belasting di Bermuda pa bay bolter y simplifica totalmente nos sistema actual di belasting. Y porfin Aruba ta bay haya su fair share y e pueblo ta haya poder di compra. Dia 22 di september partido ReD ta conta cu bo voto pa por logra nos meta.

You May Also Like

mas (1).JPG

Otro partido MAS ta presenta su mes y critica color di POR

Un parti di e presentacion di partido MAS di Holmo Henriquez ayera a bay ...

Partido POR lo trece cambio na fabor di e pensionado

Plataforma E forsa Nobo POR a dicidi di prepara e oferta na comunidad y ...

Comision di Bon Boluntad no activo den eleccion

Despues di ta activo durante 6 eleccion, Comision di Bon Boluntad (CBB) no lo ta ...

‘Wardando ley di prohibicion di plastic, oxybenzone y styrofoam yega parlamento’

Parlamentario Daphne Lejuez (MEP) Manera conoci, gobierno di Aruba recientemente a anuncia cu entrante ...

‘E destino di Aruba ta den man di pueblo’

  Dia 22 di september 2017 e pueblo di Aruba lo bay urna electoral ...

Partido MEP: ‘AVP dispuesto pa para riba nan cabes en bes di acepta responsabilidad’

ORANJESTAD – Aruba mester a soporta e fracaso financiero di gobernacion di ex-Gabinete Mike ...