Cambio den ley laboral pero alabes fortifica e capacidad di trahadonan lo yuda e clima di inversion.

Flexibilisa leynan laboral, habri Aruba pa expertonan stranhero, crea confianza cu tur comerciante ta hunga segun e mesun reglanan y yuda e trahado Arubiano desaroya habilidadnan manera persistencia, bira mas asertivo y comunica miho, ta rekisitonan esencial pa por mehora clima di inversion di Aruba.

Raad van Advies a formula un serie di conseho amplio y bon describi pa yuda Gobierno den su intentonan pa reforma y traha riba recuperacion economico na caminda pa uno duradero.

Raad van Advies ta urgi Gobierno pa cambia e sistema di procedura pa permiso pa negoshi. Mester simplifica, y haci e proceso di establecimento mas cortico. No ta di awor, pero ta den diferente rapportnan a conseha Gobierno pa percura cu e procedura pa haya un asina yama vestigingsvergunning, esta un permiso pa por lanta un compania, mester bira mas simpel y hasta mas cortico. E deseo ta pa pone e rekisito aki pa tur sector, cu ademas por yuda evita cu tin hopi negoshi di e mesun tipo den e mesun zona.

Banda di esaki, tin necesidad pa un liña di informacion bon organisa. Como tal mester tin un one-stop shop, pues un solo loket unda por duna percura pa duna tur informacion y unda por pidi tur e permisonan necesario (red. den pasado ex Minister di Economia, Michelle Winklaar a lanta un oficina asina, pero un di e problemanan cu a topa ta cu por ehempel, un restaurant, no mester solamente un vestigingsvergunning, pero tambe un restaurant vergunning y esaki ta cay bao otro Ministerio. Den otro palabra, un ‘one- stop shop’ mester coordina cu tur Ministerionan competente). Pa logra mester (sigui) digitalisa servicio publico na ciudadano y empresario, cu ta conduci na servicio na ciudadano cu ta mas lihe y cu ta brinda satisfaccion, mientras cu tin menos costo administrativo pa e mesun ciudadano y empresanan. Pues, Raad van Advies ta urgi pa haci uso di e-government y e investigacion si cierto permisonan tin balor agrega.

Maneho di estadia pa expertonan stranhero

Segun Raad van Advies tin un punto di atencion cu ta importante pa Aruba. Y esaki ta cu Aruba mester di expertonan stranhero pa yuda desplega actividadnan economico nobo. E ta imposibel pa conclui cu na Aruba tin suficiente experticio riba tur tereno y esaki lo no ta diferente den futuro. Como tal, Raad van Advies ta kere cu mester bin un maneho cla di estadia pa expertonan stranhero. Di un banda mester permiti pa e procedura di admision bay mas eficiente y di otro banda, mester bin un maneho cla riba reglanan pa e admision di miembronan di famia. Raad van Advies ta sugeri pa hiba un maneho di ‘porta habri’ pa asina por atrae expertonan stranhero.

Regulacion e-commerce

Comercio, servicio financiero y otro actividadnan comercial ta sucede mas y mas pa medio di canalnan digital, esta e-commerce. Digitalisacion di actividad economico y e creacion di infrastructura ta necesario, pa asina por fortifica e posicion di competencia y crecemento economico. Pa e motibo aki tin un necesidad fuerte pa regula y facilita e-commerce na Aruba.

Ta trata aki specificamente pa kita e inseguridadnan di e-commerce, facilita e trafico electronico y garantisa algun balor y norma fundamental den e ambiente electronico. Gobierno a trata di regla e area aki pa un parti na 2017, pa medio di un ‘interim-regeling.’ Den e splicacion di e proyecto di ley, Gobierno a bisa cu e actividad aki lo keda regla den e Codigo Civil y tambe e ley Comunicacion Electronico, LEC. Sinembargo no a trece cambionan ainda den e Codigo Civil y e proyecto LEC mester keda concipia ainda. Raad van Advies ta urgi pa haci esaki mas pronto posibel.

Flexibilisacion ley laboral

E leynan laboral actual tin consecuencianan financiero (negativo) substancial pa dunado di trabao. E organisacion di dunadonan di trabao ATIA a expresa su preocupacion caba riba e hecho y a indica cu e leynan laboral actual a conduci na un mercado laboral stagna.

Pa por crea un base saludabel pa crecemento economico y fortifica e posicion di concurencia di Aruba, mester tin un mercado laboral flexibel unda ta haci mas facil pa drenta y sali. Na e momentonan aki, e leynan laboral ta brinda poco espacio pa contractonan laboral flexibel. Como tal, dunadonan di trabao, pa motibo di e sistema legal di labor, mester scoge pa contratonan pa tempo indefini y como tal ta mara na gasto di personal fiho cu ta innecesario. Un flexibilidad laboral legal mas grandi, particularmente ora ta papia di flexibilidad contractual, no solamente ta produci reduccion di costo pa dunado di trabao, cu ta keda traduci na menos gasto pa haci negoshi na Aruba, pero e ta crea un mercado labora cu ta mas competitivo, flexibel y di calidad halto, cu ta necesario. Contratonan flexibel y e hecho cu trahadonan no mester asumi sin mas cu nan ta haya un contrato fiho, lo stimula tanto dunado di trabao como trahadonan pa keda mehora nan mesun capacidad, inverti den re-educacion pa asina haya y mantene un posicion mas halto den e mercado laboral.

E hecho cu tampoco por kibra un acuerdo laboral cu trahadonan cu a yega nan edad di pensioen, por ta hopi pisa den varios circunstancia. Di otro banda, pa proteha e trahado, mester considera si den caso di flexibilisacion di leynan laboral, pa crea un red di seguridad (sociaal vangnet) pa esnan cu ta buscando trabao, den forma di un asistencia financiero limita, en bes di e cesantia.

Modernisacion di ley di propiedad intelectual

E maneho economico di Gobierno ta dirigi tanto pa innovacion y tecnologia berde (duradero). Pero Raad van Advies ta enfatisa cu tin hopi necesidad pa trece regulacion riba tereno di derecho di propiedad intelectual, bao cua ta cay e derecho di autor, derecho di marca, derecho di patente y proteccion di secresia di compania. E ley di Aruba riba propiedad intelectual mester di modernisacion. Raad van Advies ta conseha pa inicia e proceso mas lihe posibel.

Promocion di un ‘level playing field.’

Den e nota ‘Entrepreneurs development policy for Aruba 2018-2021’ ta menciona cu pa motibo di presencia di monopolionan existente y formacion di cartel den e area di empresa chikito y mediano, tin e percepcion cu no tin oportunidad ni regla igual pa tur, cu ta crea competencia inhusto. No tin e asina yama ‘level playing field.’ Mientrastanto Parlamento a pasa e ‘mededingingsverordening,’ esta e ley contra competencia inhusto y formacion di cartel (red. Bon Dia Aruba a acerca Asociacion di Bankeronan di Aruba riba nan posicion cu e ley a pasa, y despues di a manda un serie di pregunta, e asociacion a haci uso di palabracion entre e banconan, pa no duna comentario. Ta net e palabracionnan aki, e ley lo mester elimina pa mehora competencia na interes di e consumido). Raad van Advies ta kere cu mester atende cu e percepcion cu corupcion basa riba palabracionnan den sector mas pronto posibel pa crea mas confianza.

Banda di esaki, partnernan di Aruba indica na Banco Central di Aruba cu nan ta preocupa pa e falta di mantencion di ley en general. Actornan na Aruba ta di opinion cu tur esakinan ta produci competencia inhusto, pasobra ta kita cualkier balans y ta crea un asina-yama ‘unlevel playing field’ entre companianan cu si ta mantene nan mes na regla y otronan cu no ta preocupa mucho cu ley.

Finalmente, e acceso na placa pa empresarionan y e sector di comercio chikito y mediano ta limita y caro. Mester amplia e posibilidad pa haya financiamento pagabel pa e gruponan aki, por ehempel, empresanan cu ta opera den e sectornan identifica como prometedor y innovativo. Por amplia e fuentenan di financiamento, por ehempel cu fondonan di inversion, garantia di Gobierno, ‘angel investors’ y ‘venture capital.’ Un angel investor ta un persona cu ta percura capital pa un negoshi nobo, mayoria biaha a cambio di debe cu por keda converti den accion. Angel investors ta sostene e companianan nobo ora cu institutonan convencional manera banco no ta dispuesto pa haci esaki.

Tur e temanan aki mester haya atencion di parti di Gobierno, segun Raad van Advies. Pasobra ta di e forma aki ta promove e level playing field y asina, mehora e clima di inversion.

Educacion: adapta curiculo EPI

Raad van Advies ta kere cu ta crucial, banda di un mercado laboral flexibel, ta esencial pa un desaroyo economico sostenibel desea, e mesun mercado aki e capacidad, experticio y competencianan disponibel. E condicionnan pa innovacion y diversificacion di economia ta netamente e rekisitonan aki.

Conseho Social Economico, SER a indica cu na Aruba no tin e capacidad suficiente pa yuda den e desaroyo aki y cu enseñansa mester ta dirigi pa cumpli cu e necesidadnan aki. IMF tambe a indica e importancia di e capacidad di conocemento y habilidadnan, mirando e posicion geografico di Aruba, e desaroyo di sectornan di capital y tecnologia di energia renobabel a largo plaso lo habri caminda pa diversificacion economico. E falta di forsa laboral prepara sinembargo ta un reto pa e iniciativa aki por logra.

Como tal, Raad van Advies ta conseha pa acopla e curiculo di e institutonan educativo pa profesion, manera EPI, na sectornan cu mester desaroya ainda, manera e sector primario, economia di conocemento (bao cua solucionnan di energia sostenibel) y economia circular y necesidad di mercado laboral. Ademas di mehoracion di capacidad tecnologico, mester pone atencion na e desaroyo di asina yama ‘soft skills’ cu ta esencial tambe. Esakinan ta habilidadnan personal cu mester yuda e trahado Arubiano ta mas asertivo, haya habilidadnan comunicativo, pensa strategico, desaroya e habilidad di busca solucion, traha segun obhetivo, traha den team y persistencia.

 

LEAVE A REPLY

Please enter your comment!
Please enter your name here