Cu e biahe no asina inespera di nos Promer Ministro pa Hulanda, e expectativanan a aumenta considerablemente cu porfin lo tin un acuerdo cu por keda firma diabierna venidero den Conseho di Ministro di Reino. Cu esey lo yega un alivio grandi pa hopi hende, y nos por contempla nos futuro cu mas trankilidad.

Y esey ta absolutamente indispensable, pa e ciudadano den problema, pero tambe pa sector priva, cu sa cu tin un caminda largo pa bay ainda pa yega na recuperacion di economia. Nos ta cerca anto di e momento cu por cuminza cu e proceso ey, pero ta significa tambe cu nos mester cuminza, o mejor dicho, sigui pensa y discuti kico nos mester haci.

Den e discusion aki mester tuma na cuenta cu banda di e ideanan cu nos por tin, esnan cu ta bin pone placa pa realisa tur esaki, tambe tin un idea unda nos mester bay. Den e paquete pa Aruba ta propone varios mehoracion, cu no ta desconoci pa nos, pero cu sigur no ta haci tur nos politiconan alegre, pasobra nan ta significa un kiebro cu nan manera di hiba negoshi. Ta facil pa bisa den teoria cu ta indispensable pa soluciona e problemanan aki, pero nan tin un motibo pakico nan t’ey. Nos ta trata aki un di nan, cu por cierto tambe ta bin dilanti den e articulo den e edicion aki cu ta trata e consehonan di Raad van Advies encuanto e mesun temanan.

Un di e temanan cu tanto Raad van Advies den nan conseho, como Hulanda, ta toca den nan paquete pa Aruba, ta flexibilisacion di ley laboral. Aki ta trata por ehemplo di flexibilisacion di e reglanan encuanto contrato laboral, unda e opinion ta cu tin demasiado poco posibilidad pa traha cu contrato temporal, loke ta forza dunadornan di trabao pa bay den contrato pa tempo indefini, cu ta bira asunto costoso na momento cu resulta cu e persona contrata no ta esun idoneo pa e puesto. Esey ta un realidad y no ta nada straño cu ta propone flexibilisacion via e solucionnan cu a busca na Hulanda tambe. Aki nos tin un punto importante, pasobra nos tin e impresion cu ta pensa cu e solucionnan ey no a penetra na Aruba ainda, mientras varios di nan tin aña y hasta decada introduci aki. Asina nos conoce e fenomeno di uitzendbureau pa mas di dos decada caba, hopi tempo promer cu finalmente a bin legislacion pa regula e sector aki. Sin embargo, mescos cu ta conta pa otro segmento di e mercado, aki tambe nos tin duda grandi si ta existi e debido control y supervision pa garantisa e derechonan di e trahadornan cu ta opta, o ta obliga pa opta pa e forma aki.

Talvez un ehemplo bibo di e practica diario na Aruba ta ilustra loke ta pasando aki: un persona ta bay na e departamento gubernamental cu ta maneha empleo y ta keda referi na un hotel cu mester di personal. Despues cu e hotel a tum’e na servicio y nan a expresa di ta hopi contento cu su prestacion, e ta haya tende despues di varios dia cu nan no ta bay dun’e empleo sino cu nan ta referi e persona na un di e uitzendbureanan cu ta brinda servicio na e hotel. E ta nenga di acepta e condicionnan di e uitzendbureau y ta bay reclama e asunto na e departamento, cu segun nos a comprende no a haci nada al respecto. Por ta cu e hotel tabatin un stranhero cu mester a renoba permiso y cu di e forma aki ta desvia henter e asunto den un direccion no corecto.

En todo caso, pa bolbe na e nivel general di e asunto, uitzendbureau y e famoso fenomeno Hulandes di ‘nulurencontract’ ta existi pa hopi aña caba den nos economia. Kico esaki ta significa? Cu e posibilidadnan di flexibilisacion pa e labor menos bon paga ta existi caba, y ta haci bon uso di esakinan. Otro cos ta ora nos ta papia di e jobnan mihor paga, cu ta requeri un estudio avanza y experiencia. Aki ta dificil imagina cu un persona ta laga maniobr’e den e posicion di acepta algo menos cu un contrato fiho, loke naturalmente tin su consecuencianan financiero pa e empresa ora cos no bay bon. Aki flexibilisacion di ley pa loke ta retiro no ta bay cambia tanto. Pero tin algo mas pa tuma na cuenta: Hulanda a bay full den flexibilisacion laboral, cu e consecuencia cu hopi hende, cu bon educacion of no, tin problema pa haya financiamento pasobra nan no por wak mas leu cu un o dos aña den futuro. Esey ta loke nos kier?

Ademas cu tin algo otro cu sigur mester mehoracion, y esey ta e proteccion di e trahador contra abuso di banda di e empresario, cu na e momento aki ta absolutamente deficiente. Den restructuracion di e aparato gubernamental un di e puntonan importante ta pa bay back na e base fundamental, y esey ta cu e aparato gubernamental mester haci loke e mester haci y esey, pa loke ta e tareanan di supervision, ta na un nivel simplemente tristo. Ora yega momento di discuti e tema aki dentro di e acuerdo, lo mester pone atencion riba e deficiencia aki.

 

LEAVE A REPLY

Please enter your comment!
Please enter your name here