(EFE) – Ayera dialuna, miles di persona a subi caya di e ciudadnan principal di Colombia pa protesta contra e reforma economico y politico di presidente Gustavo Petro, e prome manifestacion contra su Gobierno desde cu el a asumi e funcion dia 7 di augustus ultimo.
Na Bogota, hende a reuni principalmente na e Parke Nacional y na Plasa Monumento de los Caidos. Mayoria tabatin e bandera di Colombia y a bisti T-shirt blanco.
E denomina “Gran Marcha Nacional” tin programa varios concentracion na mas di 20 ciudad di e pais y tambe na varios ciudad di Merca, Mexico, Panama y Suisa”, segun loke arkitecto Pierre Onzaga, un di e organisadonan di e mobilisacion, a bisa y tambe a anuncia un segundo jornada pa dia 24 di october.
Minister di Interior, Alfonso Prada a bisa cu Gobierno di Petro ta respeta e protesta “y cu ta bay mantene orden publico pacificamente”.
“Oposicion a convoca pa awe dialuna un jornada nacional di protesta. E gobierno aki ta bay respeta e derecho cu tur ciudadano tin di protesta social. E expresionnan di mal contento semper lo ta bonbini y ta wordo scucha”, Prada a bisa riba Twitter.
Onzaga a splica cu e protesta ta pa motibo cu hende ta compronde cu reforma tributario cu gobierno a plantia ta bay afecta esunnan mas pober.
E iniciativa aki, presenta pa minister di Hacienda, Jose Antonio Ocampo na augustus ultimo, ta busca recauda 25 biyon peso anual (5.550 miyon dollar) placa necesario, segun Gobierno, pa reduci e debe social.
Un otro motibo di e protesta ta e rechaso na e proyectonan di reforma laboral, cu Gobierno ta bay presenta pa otro aña y codigo electoral, entre otro.
El a anuncia cu na final di e otro jornada nan ta bay haci un balans y e ta confia cu “tur cos lo wordo transcuri den paz”.
Mientras e protesta tabata cuminsa, Gustavo petro tabata na frontera cu Venezuela pa e reapertura oficial di fronteranan entre Colombia y Venezuela cu tabata cera for di 7 aña caba.
