Diaranson a yega un delegacion grandi di CONCACAF pa motibo cu pa prome biaha lo tuma luga e conferencia di e organisacion di futbol na Aruba. CONCACAF ta e Confederation of North, Central America and Caribbean Association Football.
Bond di futbol di Aruba, esta AVB ta bisa cu nan tin un vision con nan ta bay drecha futbol aki na Aruba. Nan no ta haci esaki nan so, pero nan ta haci esaki conhuntamente cu FIFA, CONCACAF y KNVB di Hulanda. CONCACAF tin respet suficiente y nan ta mira e trabou cu ta haciendo ta bon, di cual nan a dicidi di tene e conferencia na Aruba, segun e bond.
E conferencia lo ta algo grandi pa Aruba, pero tambe pa futbol en general. Esaki ta prome biaha cu algo asina grandi ta pasa na Aruba, ya cu 41 pais lo bishita e conferencia aki. Lo tin un participacion di alrededor di 300 persona. CONCACAF tin 41 miembro asocia; 27 di Caribe, 7 di America Central, 4 di Noord America y 3 di Sur America. Philippe Moggio ta un Frances Colombiano y e ta ex hungado profesional di tennis, bankero, ehecutivo di deporte y awo e ta e Secretario General di CONCACAF.
