E situacion politico, social y economico di e pais bisiña Venezuela a causa e fenomeno mas grandi di migracion na nivel mundial, segun Agencia di Organisacion di Nacionnan Uni pa Refugiado (ACNUR), y Organisacion Internacional pa Migracion (OIM) ta calcula un cifra di mas di 4 miyones di migrante y refugiado Venezolano rond di mundo.

Desde varios aña pasa, Aruba y e grupo di islanan di reino Hulandes a keda afecta pa e fluho migratorio di Venezolanonan cu ta busca scapa for di nan pais via avion of cu boto, pa nan por haya un miho futuro. E solicitantenan di asilo politico a aumenta drasticamente, loke a causa cu gobierno di Aruba a cuminsa tuma accion pa siguridad di e isla, por ehempel e ciere di frontera cu Venezuela.

Durante un entrevista cu Bon Dia Aruba a haci cu Yonaiquer Sanchez, miembro di e Movemento ‘Todos por Venezuela’, el a papia di e situacion cu e Venezolanonan ta biba awendia cu e fenomeno di migracion, y con e gobiernonan di e paisnan mester tuma esaki como un simbolo di ‘solidarisacion’.

Sanchez a splica cu movemento aki a origina pa via di su preocupacion ora el a wak un grupo di Venezolanonan cu tabata deteni den un luga cu tabata bandona, y cu no tabata cumpli cu un standard humanitario adecua pa laga un persona cera eynan.

Sanchez a manifesta cu e dianan ey, e idea tabata pa hopi hende por sa kico e personanan deteni tabata pasa den e luga ey. Door di esey el a cuminsa papia cu medionan local di Aruba y asina expresa su descontento cu e problema aki.

Snachez a manda un manifiesto pa e departamento di redaccion di e corant aki, pa solicita Warda Costa stop di confisca e paspoortnan di e Venezolanonan cu ta pidi asilo politico. E defensor di derechonan humano ta pensa cu esey ta un forma di discriminacion. Asina tambe e presentacion diario cu un persona mester haci, cada dia na Warda Costa, como un manera di confirma su presencia riba nos isla.

Di mesun manera, el a contesta cu segun Acnur, entre nan standard no ta bisa cu ora un persona ta den proceso di asilo mester haci acto di presencia cada dia, pa motibo cu nan no ta personanan cu tin espacio economico. Asina tambe e retencion di nan paspoort cu ta un documento di identidad personal.

“Nos kier pa e instancianan concerni tuma control, pa nan sa ki sorto di persona ta drenta y ta sali for di Aruba, pero e tipo accionnan ey mi ta considera cu ta un tipo di discriminacion”, Sanchez a sigura.

Pa finalisa, segun Sanchez, e manifiesto cu el a skirbi como un comunicado ta expresa cu ta rigi bou e Constitucion di Aruba, unda ta estableci cu tur persona mester tin e mesun trato. Como lider di e movemento ‘Todos por Venezuela’ e ta considera cu e confiscacion di paspoort, e detencion y e rekisito pa presenta tur dia, nan ta acto di discriminacion. Pa via di esey Sanchez lo kier haci un yamada pa e poblacion Arubano, pa tin hermandad y solidaridad, comprension pa e crisis humanitario cu Venezuela tin na e momentonan aki, y evita cu gobierno haci campaña cu lo incita discriminacion y xenofobia contra e Venezolanonan na Aruba.