Mañan Stichting Kompas for Students su tayernan lo cuminsa, unda cu e aña aki a agrega un componente enfocando riba salud mental di studiantenan cu ta bayendo rumbo Hulanda pa sigui nan estudio.
E retonan cu studiantenan Caribense ta enfrenta ora nan ta studia na Hulanda ta conoci ampliamente y den varios faceta di nan estudio retonan nobo ta haci nan mes conoci. Sinembargo e parti inicial di bay un pais stranhero y ahusta na e sistema ey, ta loke ta pone hopi studiantenan Caribense experiencia un ‘culture shock’. ‘Studiantenan cu ta bayendo Hulanda ta pasando den un contratiempo pisa y nan ta pasa den retonan di prome caba. Manera ki documentonan nan tin mester pa inscribi y nan propio preparacion mental’, asina presidente di e fundacion Deon Bisslik ta conta Bon Dia Aruba.
E presidente, cual conhuntamente cu Viviana Lopez Paz (secretaria) ta desaroya proyectonan pa sostene studiantenan bayendo Hulanda y tambe mientras nan tempo aya, ta haya cu e problemanan aki cu studiantenan di Aruba y Caribe ta enfrenta no lo mester t’ey.
‘No tin organisacionnan na Hulanda cu ta guia studiante di MBO’
Bisslik a splica cu e rason dicon e mes semper ta haci su mes disponibel pa studiantenan hasta despues cu ya nan tin par di luna na Hulanda, ta pasobra e mes no tabatin guia disponibel mientras e tabata studia na Hulanda. “Como studiante di MBO no tabatin ningun guia disponibel pa mi.”
Tayer ta inclui nutricion, salud mental y budgeting
Esey ta e rason dicon actualmente Kompas ta ofreciendo e tayernan preparatorio e siman aki na Aruba. Lopez Paz a splica cu e aña aki nan a agrega un componente di preparacion riba tereno di salud mental, mirando cu den ultimo tempo por mira cu esaki ta bira un topico masha importante y un reto crucial pa studiantenan biahando pa e pais Europeo. Esaki, hunto cu e training di personalidad ta adicional na loke Kompas ta ofrece ya caba den añanan anterior, esta preparacion den area di budgeting, nutricion y impuesto.
Entrante 20 di juni, coriendo te 10 di juli lo tin tayernan di Kompas. E prome grupo lo ta pa 20, 21 y 22 di juni, mientras e di dos grupo lo ta pa 27, 28 y 29 di juni. E grupo final lo ta pa 8, 9 y 10 di juli.
Meta
E meta cu Kompas tin ta pa conscientisa studiantenan riba e realidad cu ta spera nan na Hulanda. Pues por ehempel ta purba siña studiantenan cu si no ta bay cushina pa nan mes nan lo mester gasta basta placa riba cuminda riba caya, cual no necesariamente ta bon pa e aspecto di nutricion. Bisslik y Lopez Paz su fundacion tin experiencia na Hulanda y esaki ta loke nan ta brinda na studiantenan, manera con ta regel nan seguro y con ta anda cu impuesto y con pa haci compras riba budget.
Pa por haya mas informacion di e tayernan cu Kompas lo bay tin pa fin di juni y cuminsamento di juli por bay riba nan website www.kompasforstudents.com.
