Centenares di mucha muhe ta casa cu homber Chines a cambio di placa pa nan famia, mayoria di nan parti di e comunidad Cristian di e pais, e mas pober.

Anteriormente AP a publica con pastoornan Cristian, como tambe traficadonan Pakistani y Chines, ta traha hunto den un comercio lucrativo, gañando muchanan muhe pa casa fraudulentamente, y nan ta haya nan mes atrapa na China, cu esposonan abusado.

For di e tempo ey, un investigacion policial a descubri cu hopi di e muhenan ta forsa den prostitucion na China. Un bista di e red di traficacion extenso a keda revela mediante un serie di aresto den siman recien na man di Agencia Federal di Investigacion Pakistani, como tambe testimonio di e victimanan, hopi di ken anteriormente tabata demasiado spanta pa bin dilanti.

Ta bisa e famianan cu nan yiu muhe lo casa cu un comerciante rico, y lo tin un bon bida na China, y cu e casamento lo ta beneficioso pa tur banda – mayornan pober ta haya placa, mientras homber Chines ta haya un muhe den un pais unda tin mas homber cu muhe. Pero investigadonan ta convenci cu mayoria di e muhenan ta bendi den prostitucion, segun dos oficial di ley involucra den e investigacion a bisa AP.

Sinembargo, hasta mientras investigadonan ta revelando e magnitud di e red criminal, gobierno Pakistani kier tene secreto. Oficialnan halto a duna ordo na investigadonan pa keda keto, pasobra nan no kier pone nan relacion economico cu China den peliger.

Beijing ta invirtiendo biyones di dollar na Pakistan como parti di nan iniciativa ‘Belt and Road’, un empresa global cu meta pa reconstrui e Silk Road y conecta China cu tur skina di Asia. Embahador di China na Pakistan a sali riba television local nengando cu muchanan muhe ta trafica na China y bendi den prostitucion.

E asunto di traficacion humano no a keda discuti durante un bishita di vice presidente Chino, Wang Qishan, kende a tene combersacion cu prome minister Imran Khan y e presidente di Pakistan. Wang a nenga cu traficacion ta tuma luga, y a referi na un video circulando online, cual traficadonan ta mustra famia di e victimanan pa recluta nan, cu ta mustra esposanan Pakistani na China bailando y mustrando feliz.

 

LEAVE A REPLY

Please enter your comment!
Please enter your name here