Por medio di e articulo aki nos ta reacciona riba cierto ponencianan di politiconan Hulandes. Despues cu gobierno di Reino a yuda perhudica pais Aruba su financia publico, awor nan kier crea un crisis constitucional.

Financia Publico
Ta importante pa señala cu na 2009 Aruba tawata conoce un situacion financiero sano. Na 2014 Hulanda a interveni door di “ondeugdelijk bestuur” di gabinete Eman II. Na 2015 gobierno di Reino a tuma e supervision financiero over pero na luga cu e situacion financiero a drecha el a empeora. Pues Gobierno di Reino a tene “onbehoorlijk toezicht”.

Tres acto desastroso di Gobierno di Reino cu a perhudica nos pais, ta e hecho cu nan a permiti Mike Eman traha presupuestonan ficticio cu tawata conta cu remision di debe na SVB, supuesto entradanan di apertura di Citgo na 2016 y supuesto entradanan di apertura di Citgo na 2017. Te hasta ora CAft a señala e actonan cosmetico aki, gobierno di Reino no a actua y a permiti’e.

Crisis Constitucional
Ta importante pa nota cu a base di e ley di supervision financiero nobo, keto bay tin supervision independiente. Solamente a cambia tur e aspectonan anticonstitucional.

Tratamento di e ley aki a tarda pa e hecho cu Hulanda kier a negocia acomodacion di un ex- politico Hulandes, cual tawata empugna cu e ley. Es decir, e tardansa no tawata culpa di parlamento, manera sr. Knops ta insinua.

Knops ta keda insinua cu no tin cumplimento cu e protocol cera entre Aruba y Hulanda. Knops mester compronde cu un protocol entre 2 gobierno hamas por limita un Parlamento. Esey ta e esencia di un estado di derecho. Pero ta parce cu Hulanda kier forsa Aruba actua contra su constitucion of kier crea un crisis constitucional.

Adicional mester nota cu gabinete Wever-Croes ta cumpli cu aspectonan di maneho, manera palabra den e protocol. Y Knops sa esaki. Ainda nos por corda su palabranan di elogio pa e maneho di Evelyn Wever-Croes.

Pa Conclui
Nos ta comparti Knops su preocupacion pa loke ta e debe halto. Esaki sinembargo ta uno cu Hulanda mes a yuda crea. Pa loke ta e supervision financiero net nada no a cambia. Pues e ponencia cu lo a desmantela supervision financiero ta incorecto.

Pero locual tin nos mas preocupa ta e postura Hulandes pa no respeta democracia y nos estado di derecho. Y Knops tin tur su rason cu e ultimo palabranan pa loke ta e situacion aki no a wordo papia ainda. Y e palabranan lo resona internacionalmente si ta necesario.

Manera Raad van State di Hulanda mes ta señala:
“Het staat de wetgever vrij om in een wet af te wijken van een reeds bestaande wet en dat dit een fundamenteel democratische verworvenheid is. Immers kan het niet zo zijn dat de effectuering van wijzigingen die door verkiezingen gelegitimeerde (nieuwe) wetgever nodig of wenselijk vindt, geblokkeerd wordt (W04.18.0031/I.VO)”.

 

LEAVE A REPLY

Please enter your comment!
Please enter your name here