(AP) — Pakistan y Afghanistan a logra un acuerdo pa mantene un alto-al-fuego despues di dialogonan di paz na Istanbul, segun un anuncio di e ministerio di Asunto Exterior di Turkia diahuebs, despues cu e dialogo entre e dos paisnan a keda stanca na comienso di siman.
Segun un declaracion publica den nomber di Pakistan, Afghanistan y e mediadornan Turkia y Qatar, e dos partido ta plania pa bolbe topa na un reunion di nivel mas halto na Istanbul dia 6 di november pa finalisa con e alto-al-fuego lo ser implementa.
“Tur partido a acorda pa instala un mecanismo di monitoreo y verificacion pa garantisa mantenemento di paz y impone sancion riba e partido cu viola e acuerdo,” e declaracion a bisa.
E ronda nobo di negociacion, facilita pa Turkia y otro paisnan, tabata orienta riba rebaha e tensionnan na frontera entre e dos paisnan cu, na comienso di luna, a intercambia fuego, lagando decenas soldad, ciudadano y militante morto.
Aunke e ronda anterior di dialogo a fracasa, e alto-al-fuego a mayormente manteni, y ningun enfrentamento fronteriso nobo a ser reporta durante e siman aki. Sinembargo, tur dos pais a mantene entradanan riba frontera cera, lagando centenares di truck cu mercancia y refugiadonan keda stanca na cada banda di frontera.
Minister di Defensa di Pakistan, Khawaja Mohammad Asif, a bisa na e canal noticiero Geo cu e decision pa duna paz un otro oportunidad a ser tuma na peticion di Qatar y Turkia, y cu e delegacion Pakistani, cu tabata spera pa bolbe cas diaranson, a ser pidi pa keda na Istanbul.
Segun television estatal Pakistani, Islamabad a bisa cu e dialogonan lo ta basa riba e peticion principal di Pakistan pa Afghanistan tuma accion cla, verificabel y efectivo contra gruponan militante.
Na Islamabad, dos oficial di seguridad halto a conta Associated Press cu Pakistan a enfatisa atrobe cu tera Afgano no mester ser usa pa loke nan ta yama “terorismo” contra Pakistan, y cu e pais ta aprecia e rol constructivo di su habitantenan y ta keda compromete cu un solucion di paz den buena fe.
E oficialnan a papia bao condicion di anonimidad pasobra nan no tabata autorisa pa discuti e asunto cu media oficialmente.
Tensionnan a subi na comienso di luna despues cu a sinti explosionnan na Kabul, y e gobierno Taliban di Afghanistan a acusa Pakistan di realisa atakenan aereo den e capital y di bombardia un mercado den e parti oriente di e pais.
Oficialnan Afgano dia 12 di october a bisa cu nan lansa atakenan represalia dirigi riba puestonan militar Pakistani, reclamando cu 58 soldad Pakistani a muri. Sinembargo, e ehercito di Pakistan a bisa cu e combate a laga 23 di nan soldadnan morto y cu e operacionnan tabata dirigi riba sitionan scondi di militantenan den teritorio Afgano.
E enfrentamentonan a motiva Qatar pa organisa un dialogo di emergencia entre e dos paisnan, cual a resulta den un alto-al-fuego dia 19 di october. Despues di esaki, cuatro dia di negociacion den Istanbul a sigui, pero a finalisa sin resultado diamars. Desde e tempo ey, Qatar y Turkia a sigui traha pa trece e delegacionnan back na mesa di negociacion, segun e oficialnan Pakistani.
Diahuebs, e hefe di e ehercito di Pakistan, Field Marshal Asim Munir, a bisa na un reunion cu lidernan tribal den Peshawar cu Pakistan ta buscando paz cu tur su bisiñanan, incluyendo Afghanistan, pero no lo tolera terorismo transfronteriso for di tera Afgano.
El a agrega cu den e ultimo aña, Pakistan a demostra moderacion y a tuma paso diplomatico y economico pa mehora relacionnan, pero cu e gobierno Taliban a prefera duna sosten na TTP, un grupo clasifica como terorista pa UN y Merca mas cu un decada pasa.
Pakistan a mira un aumento den atakenan militante durante e ultimo luna, mayoria di nan reclama pa e Taliban Pakistani, of Tehrik-e-Taliban Pakistan, un grupo cu tin laso estrecho cu e Taliban den Afghanistan. Hopi di nan lider y combatientenan ta scondi den Afghanistan desde cu e Taliban a bolbe na poder na 2021.
E ehercito Pakistani a bisa diahuebs cu nan a mata 18 militante den dos operacion separa den e provincia zuidoost di Balochistan. Den un otro declaracion, el a bisa cu cuater Taliban Pakistani, incluyendo un obhetivo di alto balor, a ser mata mientras cu nan tabata purbando di drenta den Bajaur, un ciudad cu ta comparti frontera cu Afghanistan.
