Home Regional Panama: Mayornan di ministro ta sconde placa na Andorra

Panama: Mayornan di ministro ta sconde placa na Andorra

285

(ElPais) – E mayornan di Demetrio Papadimitriu, ministro di Presidencia di Panama bao  mandato di presidente Ricardo Martinelli (2009-2014), a move 16 miyon dollar pa Andorra, un pais di 78.264 habitante entre Spaña y Francia unda te aña pasa secreto bancario tabata vigente.

María Bagatelas Papadimitriu y Diamantis, a fayece, tabata maneha e suma aki entre 2010 y 2014 mediante un sistema di 45 cuenta na Banca Privada d’Andorra (BPA) y Credit Andorra, segun un informe no emiti di e Unitat d’Intelligència Financera d’Andorra (UIFAND).

A traves di e set up aki, e pareha a cobra 5,5 miyon dollar di tres empresa constructor cu negoshi y interes na Panama.

Asina e pareha Papadimitriu a ricibi cinco miyon dollar di e empresa Constructora Panacol de Panama. E placa a yega na december 2012 na un cuenta di cifra so, na Crèdit Andorrà. Ta trata di un sistema concebi pa garantisa confidencialidad cu ta impedi hasta e empleadonan di e banco conoce e identidad di e cliente. E corant El Pais a trata sin exito di haya e version di banda di e empresa Constructora Panacol.

Den otro asunto, e presidente di e empresa di Costa Rica Constructora Meco, Carlos Cerdas Araya, a transferi na januari 2011 na e pareha 199.972 dollar na un di nan 40 cuentanan na  Crèdit Andorrà.

Constructora Meco ta un di e shete contratistanan investiga pa nan presunto vinculacion cu e asina yama caso Blue Apple, cu ta trata di un plan di soborno a cambio di e otorgamento di obranan publico na Panama. E empresanan bao sospecho a ricibi contractonan miyonario durante gobierno di Martinelli, segun e corant La Prensa.

Constructora Meco a indica na El Pais cu no ta existi un acusacion formal di fiscalia di Panama contra e empresa relaciona cu Blue Apple pero ta admiti cu nan a entrega na procurador general di e pais aki informacion “pa aclara e caso.”

E investigacion a duna cu e pareha a cobra di companianan manera Constructora Internacional del Sur, Monterde NG Power, Inversiones del Cono Sur, y varios mas.

E investigadonan a sigura cu e tata di e ex ministro di presidencia tabata controla 133 compania Panameño. Hunto cu su esposa el a haya varios transferencia di Meinl Bank, un entidad financiero di Antigua y Barbuda utilisa pa e empresa constructor Brasileño Odebrecht, pa paga sobornona funcionario halto, presidente y prome ministro di como 12 pais na America Latino a cambio di otorga obranan publico di gran magnitud.

Gobierno di Andorra a anula secreto bancario aña pasa. Autoridadnan di e pais aki a interveni na maart 2015 na Banca Privada d’Andorra pa un presunto caso di labamento di capital. E doñonan di e entidad, cu a yega na tin 9.000 cliente y un volumen di negoshi di 8.000 miyon euro, ta nenga e acusacionnan.