(EFE) – Canciyer di Panama, Erika Mouynes, ayera diaranson a adverti riba un posibel aumento den e migracion iregular cu tin Merca como destino, na unda a calcula cu mas di 65.000 persona por ta dirigiendo na e nacion aki despues di atravesa su pais.
Na un entrevista Mouynes a considera cu loke ta mira awo, “ta e comienso di algo”.
“Nos ta bin ta bati alarma desde varios luna atras riba esaki y loke nos por bisa awor ta cu pa e cantidadnan cu nos ta mira, inmigracion ta bay subi” e hefe di diplomacia Panameño a declara, y tambe a expone den reunionnan cu autoridadnan Mericano e preocupacion cu su pais tin pa e situacion aki.
“Loke ta pasa, ta cu personanan ta bay riba pia y ta un migracion slow, pero nan ta bay yega”,
Mouynes a pronuncia poco despues cu a keda conoci un crisis nobo na frontera di Mexico cu Merca pa e yegada masivo di migrantenan den ultimo simannan, den su mayoria Haitiano, cu a congrega den un campamento improvisa bao un brug cu ta conecta e localidad di Del Rio (Texas) cu Ciudad Acuña, di Mexico.
Segun e canciyer, si na su pais for di januari mas di 86.000 migrante a atravesa e frontera, entre Mexico y Merca via Texas tin casi 20.000, “esey ta nifica cu tin 65.000 mas ta na caminda” pa teritorio Mericano.
Mientras tanto, el a recorda cu na frontera cu Colombia tin entre 20.000 y 30.000 persona mas wardando pa sigui nan ruta.
Den contexto aki e canciyer Panameño a pidi pa haya un “solucion comparti” pa e fluho migratorio cu ta involucra tur e region y den special Merca.
