Roberto Borge, ex gobernador di estado Mexicano Quintana Roo, a yega diahuebs na aeropuerto internacional di Ciudad di Mexico pa enfrenta acusacionnan di corupcion, despues di extradicion di parti di Panama, unda el a wordo deteni na juni di aña pasa.
E ex mandatario estatal a yega pa 13:20 ora local na hangar di Procurador General di Republica (PGR, fiscalia) na e aeropuerto capitalino, unda a haci un examen medico breve prome cu a presente dilanti hues Enrique Beltran, cu a emiti orden di captura pa labamento di placa, y transporte pa prizon di Nezahualcóyotl, na estado Mexico.
Borge, cu a goberna e estado sur oriental Quintana Roo di 2011 te 2016 pa e partido den gobierno federal, Partido Revolucionario Institucional (PRI), lo wordo husga pa cargonan federal y delito comun, incluyendo labamento di placa, probecho ilicito di poder, malversacion di fondo publico) y desempeño iregular di su funcion publico.
Ta calcula cu e malversacion di fondonan estatal durante e mandato di Borge a yega na e cifra di 150 miyon dollar. Na su yegada na Mexico, acompaña pa agentenan di Fiscalia, el a ser ricibi pa su abogado, Mario López Padilla.
Gobierno di Mexico a gradici e colaboracion di Panama den e detencion y extradicion di Borge y asina a “haci efectivo e compromisonan asumi pa ambos pais den e tratado di extradicion firma na november 2004.”
Na Mexico tin como binti ex mandatario estatal cu ta enfrenta scandal di corupcion, y varios di nan ta busca pa autoridad o ta enfrentando proceso hudicial caba.
