do rego panorama eleccion corsou.JPG

Na medida cu e dianan ta acercando pa eleccion di dia 30 di september na Corsou, e ambiente pre electoral ta  bira tenso cu echonan cu  ta altera ordo publico den nos isla bisiña, manera e accion sindical cu ta tumando luga cu ta menasa di pone Corsou plat awe. 

Sr. Charles do Rego kende tabata director di Censo pa nuebe aña na Corsou ta observa cu e panorama politico-electoral na Corsou ta un  “hopi varia” y un tiki mas compleho cu normal.  Un factor cu ta contribui na e panorama aki –segun sr. Do Rego- ta cu e biaha aki nan a haya ta e cantidad di partido of agrupacion politico cu a inscribi dia di registracion di partido y cu tabata interesa di participa den eleccion.

Un aspecto importante ta cu e organisacion nobo a pasa den un proceso  cu nan mester demostra cu nan tin suficiente hende tras di nan. Nan ley electoral ta prescribi cu nan mester demostra no menos cu 870 firma cu ta sostene nan, kiermen 1% di e cantidad di votado di nan censo electoral di ultimo eleccion. 

Den e caso aki 7 organisacion politico a logra cumpli cu e rekisito aki debidamente.  Mientras cu otro 6 partido cu a yega caba di haya representacion den parlamento tambe lo participa. Un total di 13 partido lo participa den eleccion di luna venidero.  Aunke e cantidad di partido den eleccion venidero ta halto, historicamente esaki no ta esun mas halto ya cu sr. Do Rego a yega di experiencia den su prome eleccion como director di Censo na aña 1998, cu 14 partido cu a yega di participa.

E ta relata cu e aña ey,  el a confronta un situacion inespera cu e participacion di 14 partido, y considerando cu e ley no ta uno flexibel pa adapta mesora, e biahe ey tur e urnanan di votacion a yena.  “E tabata un problema grandi. Nos mester busca caha di carton, pero nos a keda segun e principio basico y elemental di eleccion. Tur cos a bay fantastico!”, el a bisa. 

Den e ultimo sesion cu nan a sostene recientemente cada partido a haya nan respectivo numeracion of posicion cu nan ta bay haya ariba lista, y tambe e color  cu nan ta desea.

Organo electoral
E  ta bisa cu aunke ainda Corsou no tin un organo electoral independiente manera Aruba si tin, pero nan ta gosa di hopi respet y aceptacion hopi grandi. “Mi ta kere cu esaki ta a base di profesionalismo cu nos ta desplega y e seriedad cu nos tin”, el a bisa na Bon Dia Aruba.

El a bisa cu Corsou tin un censo electoral di alrededor di 115  mil hende cu tin derecho di vota. Pero tin abstencion ya cu normalmente alrededor di 70 pa 80 mil hende ta haci uzo di su derecho di bay vota. Aunke tin hende cu ta abstene di vota den cada eleccion, pero tambe tin hende cu ta aparece den e censo electoral, pero cu no ta biba mas na Corsou. Ta e mesun situacion cu ta sosode na Aruba.

E dicon hopi no ta vota
Nan ta haciendo hopi esfuerso pa drecha e situacion. Door cu nan ta un tiki mas autonomo riba maneho financiero, nan tambe a pone cen di nan presupuesto nacional pa drecha e situacion di censo loke ta concerni hendenan cu ta biba den otro pais y nan adres.  El a elogia e echo cu semper Corsou a yega di traha hunto cu Aruba y otro isla riba e registracion di nan ciudadanonan bibando na Hulanda. Pero si nan ciudadano ta bay otro pais ya sea Republica Dominicana of Venezuela, nan sistema no ta cay den otro, manera esun Hulandes.

E  ta haya cu actualmente esaki ta un problema grandi cu nan tin. Hasta e no ta descarta cu Aruba tambe ta vulnerabel pa e tipo di problema aki, considerando e ola di migracion. nan ta bin establece riba nos isla y ta adkiri cierto derecho como  nacionalisa Hulandes, y eventualmente ta bolbe nan pais natal bek.

Tur esaki ta factor cu tin hopi hende cu no ta vota, pero tambe tin demasiado hende cu ta abstene di vota.  Pero apesar cu votamento no ta un obligacion manera otro paisnan, e ta haya cu nos nivel di votacion ta hopi halto compara mundialmente.