Papia pasado so…? O mester inclui futuro..?

Nos ministro encarga cu finanzas a trece e debate di semper back den actualidad. El a mustra den su analisis reciente kico ta e elementonan di e debe astronomico di Aruba, y ken y kico ta responsable pa esaki. Den esey el a duna tambe detayenan di e ayudo Hulandes, pa cual grupo o sector esaki a bay. No tin motibo pa critica tocante e cifranan presenta.

E unico sentimento menos positivo cu cual un observador di esaki ta keda ta cu tur esey ta bon pa recorda esnan cu consciente o inconscientemente ta conta un storia diferente, cu ta asina nos a yega na e practicamente 6.000 miyon florin di debe. Y esey pa colmo no ta inclui e gastonan di e proyectonan PPP, cu ta pone un peso adicional riba gobierno. E tempo aya cu a haci e debenan aki, tabatin yen di ‘smart guys’ cu tabata conta, na fabor di gobierno, cu e debenan aki no ta conta como ‘debe publico’ y por lo tanto no ta aparece riba balance sheet di gobierno. Na 2013 durante bishita di IMF e delegacion a mustra nan preocupacion grandi pa e asunto aki, pasobra mientras e debe ta scondi den un proyecto cu oficialmente no ta ‘debe publico’, e ta un compromiso financiero di cual gobierno no por scapa. Pero gobierno di e tempo ey a dal bay, manera semper tur nos gobiernonan ta haci, y banda di un suma di mas di 250 miyon na interes, sin paga nada riba e prestamonan mes, awor nos tin tambe un suma cu casi ta yega 100 miyon florin pa aña na pago riba proyecto PPP. Atrobe e ‘smart guys’nan ta bisa: “Si, pero pa e placa ey bo a haya algo back, toch? Bo a haya un waf, un autopista, un hospital nobo…” Esey ta berdad, aunke pa casualidad net den e dianan aki nos por ta testigo di e calidad dudoso di e obranan aki.

Esey ta parce algo inevitable, pasobra e enfasis semper ta riba cuida e asunto di esnan cu mester haya finder’s fee o otro forma di kickback, y control di calidad semper ta bin na ultimo lugar.

Pero ademas, loke nan no ta bisa ta cu e bochorno iresponsable cu placa di Aruba na e momento ey a sucede caba. E actual mandatario tin tur su razon ora e ta mustra riba e deficitnan gigantesco cu tabatin durante e promer gabinete di corte democristian, cu a haci cu no tabatin otro manera tampoco pa financia e cosnan aki. Y si no tabata pasobra – atrobe – intervencion Hulandes a pone un paro na endeuda Aruba mas ainda di e manera aki, lo nos ta pagando pa un cantidad mas di proyecto cu lo a surgi di e ‘mentenan creativo’ di e epoca ey.

E resto di e historia nos tur conoce, a bin Covid-19 y gobierno di turno mester a haci loke mester a haci. Y desde awe, ta dilanti so nos mester mira. Asina ta, ban concentra riba esey. Y ta aki ta unda cu e diferencianan di opinion ta cuminza bin. Realmente e situacion ta bastante simple: bo tin un debe publico asina grandi cu bo mester busca manera pa mas pronto posible bay back na tera firme bao di bo pia. Si no, un siguiente catastrofe por bishita nos na cualkier momento y anto…? Nos tur ta di acuerdo cu e ponencia aki? Ora nos scucha o lesa kico ta publica, aparentemente nos tur ta di acuerdo. Pero ora yega e momento pa actua consecuentemente, e diferencianan ta cuminza bin. Y pakico?

Pasobra tuma medida semper ta implica perhudica ‘somebody’. Ta imposible pa goberna, tuma medida cu ta necesario y no mishi cu ningun interes. Y ta net esey na varios momento ta trece duda den loke gobierno ta haciendo. Pakico por ehemplo a tuma como punto di lanza den e controversia cu Hulanda e interesnan financiero di e empleado publico, mientras cu no a haci tanto pa esnan cu berdaderamente ta sufriendo e consecuencianan di e crisis cu a pasa y esun cu t’ey ainda? A reserva placa pa aumenta bijstand? A logra duna e pensonadonan un 3% di aumento riba nan AOV, alegando e avance cu tabatin den recuperacion di e fondonan di SVb. Esey por wel di ta, aunke nos ta haya straño si cu te awe ainda SVb ta registrando como 1200 empleo menos cu na september 2019. Pues nos mester kere cu menos hende na 2022 ta entrega mas placa na SVb? Na su debido tiempo nos lo haya sa ta con e asunto ey ta. Pasobra asina leu cu nos sa, no a cambia nada den e proyeccionnan financiero pa e proximo añanan, cu ta mustra cu un dado momento, na 2024, nos ta obliga atrobe di contempla e siguiente paso den salvaguardia AOV, cu medida…

Kico realmente ta e insatisfaccion cu nos ta sinti den e dianan aki? Esey ta cu nos ta encanta discuti pasado, sigur di pasado recien di politica na Aruba. Nos ta bon equipa pa esey y no ta sconde pa ningun debate. Sin embargo, ki dia nos ta cuminza papia den tur seriedad di futuro di e pais aki? Nos ta keda opera den e forma actual, unda ‘pida pa pida’ nos mag haya sa kico gobierno ta proyecta? Aki poco dia nos ta bay haya henter un bataya atrobe cu Hulanda, kitando atencion di loke realmente nos mester discuti?