E areanan natural protegi di Aruba a expande formalmente y awor tin Departamento di Obranan Publico, DOW, como co-responsabel pa maneho, hunto cu Fundacion Parke Nacional Aruba, FPNA.

Diaranson ultimo, Minister di Desaroyo Teritorial, Infrastructura y Medio Ambiente Marisol Lopez-Tromp conhuntamente cu Natasha Silva, Gerente General di FPNA y Frank Benita, hefe Maneho Saliñanan di DOW a firma e decreto unda oficialmente a traspasa e maneho di 16 area di naturalesa. Ta trata di areanan cu FPNA a identifica algun aña atras caba como di gran balor pa naturalesa y ta inclui Bubali Plas, Rooi Manoonchi, otro rooinan, y tambe Spaans Lagoen. Un total di 13 di e terenonan aki ta califica como areanan natural protegi, mientras cu e otronan manera Saliña Palm Beach y hasta Bubali Plas tin un balor adicional pa infrastructura y como tal lo ta maneha conhuntamente cu DOW.

Segun e ley FPNA conforme articulo 2 di su statutonan cu a conoce un cambio dia 31 di januari 2019, ta responsabel pa maneha e areanan natural cu segun articulo 10 di e Ley Proteccion Naturalesa. Den e cuadro ey, FPNA tin alabes e tarea, den cuadro di e vision di desaroyo sostenibel di Aruba, y den luz di otro leynan di obhetivo di maneho di nos pais, pa cuida e terenonan aki. E responsabilidad ta encera mantencion, proteccion, recuperacion, desaroyo, adkisicion y maneha areanan cu ta di balor for di e punto di salida di naturalesa. Pero tambe nan tin balor pa geologia, cultura, prehistoria y historia di Aruba. E intencion ta cu e terenonan aki, particularmente terenonan cu ta adkiri den e luz di proteccion, ta y lo bira tereno di Pais Aruba.

Es mas e ley ta enfatisa e responsabilidad di FPNA pa promove investigacion cientifico na interes di biodiversidad, pa recuperacion di naturalesa y recuperacion di nan balor, ademas di desaroyo di conocemento. FPNA tambe mester inspira comunidad en general y hobennan escolar en particular, y tambe turistanan, riba e balor di e reservanan natural, y haci nan consiente di e contribucion cu nan por duna na promove desaroyo sostenibel.

Ademas, a base di su responsabilidad, FPNA lo duna un contribucion scientifico na e maneho di naturalesa y medio ambiental di Aruba.

 

Manera a mustra, 13 di e terenonan ta strictamente areanan natural cu awor por ta designa parkenan natural cu tur nan proteccion. E islanan chikito dilanti refineria cu ta cas pa e bubinan, ta entre nan. DOW y FPNA ta responsabel pa e rooinan manera Manoonchi, pero tambe esun di Arashi, y e saliñanan di Malmok y Palm Beach, ademas di Bubali Plas.

Awor lo mester sigui e proceso pa yega na palabracionnan entre e Minister di Desaroyo Teritorial, Infrastructura y Medio Ambiente, DOW y FPNA, pa hunto delinea e maneho y obligacion legal. Tambe lo mester determina e reparticion di responsabilidad. Por ehempel, DOW lo keda responsabel pa maneho y mantencion di e planta di purificacion na Bubali Plas, e sistemanan di riolering y pa e rooinan menciona den e ley ta den un estado optimal pa por responde ora di calamidad (yobida pisa).

Tur e 16 areanan cu awor tin un proteccion legal, ta di balor grandi pa flora y fauna na Aruba. E ta un proceso cu a inicia for di 2013 caba, unda te hasta a Su Altesa Real Prinses Beatrix a ricibi un presentacion di expansion di e terenonan protegi. Ya na 2013 a pasa un mocion pa proteha e areanan aki, y e tempo ey, e Minister, como Parlamentario a firma na fabor. Y awor, como Minister encarga cu Medio Ambiente, a finalisa e trayecto ey. E concretisacion tabata dia 5 di Mei ora cu a firma e Decreto Ministerial Gubernamental cu awor a bira un decreto, esta un landsbesluit. Segun Minister Lopez-Tromp, “cu traspaso di maneho di e 16 areanan na FPNA, ta duna contenido na e proceso aki.” E Minister a enfatisa cu ta sumamente importante pa comunidad ta consciente di e rikesa y balor natural di nos isla. “P’esey ta crucial pa sigui e reglanan di locual cu mag of no mag den e areanan aki por medio di borchinan cu indicacion. Si nos no cuida e areanan di balor aki, tur lo ta destrui y nos lo perde nan.”

Despues di e acto di firma, Minister Lopez-Tromp, ehecutivonan di DOW, incluyendo Director Marlon Croes, hunto cu Gerente General di FPNA Natasha Silva y Norman Kuiperi di Directiva FPNA a reuni na Bubali Plas, cu awor oficialmente ta un area cu ta legalmente protegi.