editorial 2_15_1.jpg
Dump cerca EcoGas ta mas molester ainda…
Manera cu e avalancha di critica a baha riba gobierno den e ultimo simannan tocante e situacion insoportabel na dump, gobierno a realisa cu mester haci algo, y rapido. Pero haci algo ta diferente cu anuncia “cu lo bay haci algo”. Y mes ora  ‘e tiro a sali por la culata’ pasobra ta resulta cu gobierno, presiona pa e trahadonan di Serlimar, no tin un contesta contundente pa e problema. A pensa cu mester djis anuncia cu compania di amigo di partido berde ta ‘take over’  y ya, tur hende ta calma y paz ta reina atrobe na nos pais. No e biaha aki.
No ta solamente e empleadonan a bin den accion pa motibo di e noticia. Tambe e bisiñanan lo no ta bay kere asina facil cu Prome Ministro a papia y tur cos ta. Tur esunnan envolvi ta na altura cu esaki ta un problema grandi cu ta tuma su tempo pa yega na solucion duradero. Pero mas tempran nos cuminsa, mas tempran nos ta caba tambe. Den e sentido nos por papia di hopi aña perdi, pa yega na e conclusion cu nos ta para na inicio di un proceso cu por conduci na un solucion. E aspecto di e trahadonan ta djis un di e asuntonan pa atende, pero no p’esey no ta importante. Ora gobierno tuma un decision drastico asina di tira tur cos den scochi di un otro compania, cu no ta estatal, ta mas cu logico cu nan ta haya e preguntanan cu nan a haya. 
No ta trata solamente di e personal na dump, sino tambe di esunnan cu ta recoge sushi, pasobra e competencia den esaki ta hustamente e compania cu tin tambe recogemento di sushi y e procesamento di desperdicio pa yega na produccion di gas. Djis un stap mas leu y ta papiando di duna e compania un papel mas grandi den recoge sushi tambe; esey ta un miedo legitimo di e trahadonan. Y nan tin derecho riba contesta cla di gobierno. Ademas den henter e asunto aki nan a mira cosnan straño ta sucede. Aparentemente Prome Ministro a manda henter su departamento cu nunca a keda formalisa cu yama ‘Bo Bario’ pa payroll di Serlimar. Asina el a resolve un problema pa su mes pasobra e por broma cu el a baha e cantidad di hende cu e tin riba payroll, pero mandando nan pa Serlimar ta nos ta keda paga nan salario y sin cu realmente e tipo di trabao cu nan mester o por haci, ta pertenece na un entidad manera Serlimar.
Pero tin mas aspecto pa tuma na cuenta. Kico pensa si realmente EcoGas por maneha e asunto aki? Ora nos ta purba imagina e cantidad di desperdicio cu Serlimar ta recoge tur dia, ta facil pa imagina cu dentro di poco tempo nan tampoco no sa unda pa bay cu tanto sushi. Ademas, asina leu cu nos sa, e unico gas cu nan a produci ta bay den forma di mal holo pa e bisiñanan, pero pa WEB via e tuberia cu nos a paga, nada. E rumornan ta cu tin un serie di problema tecnico cu ta impedi pa yega na produccion di gas. Esey por ta berdad, pero den e fase aki no ta interesante y nos no mester ni scucha storia pakico e asunto no ta funciona; e no ta funciona, punto. Sabe Dios ki dia si e por cuminsa opera, esey nos lo mira a su debido tempo. Pero esey no ta tur. Esey ta solamente e parti di desperdicio cu bo por gasifica; ta keda e parti material cu ta resta despues. Kico nos ta bay haci cu esey? Te awe ainda ningun gobierno kier haci nan mes impopular proponiendo separacion di desperdicio, pero ta esey nos mester…
E problema mas grandi cu nos ta mira ta cu e compania lo no tin e capacidad pa realmente procesa e desperdicio. Y esey ta implica cu nos ta bay haya un dump nobo patras di e compania amigo? Cu pa colmo ta mas den linea di biento cu e dump bieu y ta bay ta un molester permanente pa e hendenan cu despues di tanto sufrimento ta bay haya mas holo malo y contaminacion cu awor aki ta e caso caba? Vaya solucion. En todo caso, den un monton di discusion cu ta rementa riba nos atrobe, keto bay nos no ta mira un solucion structural cu ta mustra e seriedad cu e caso merece. Un di e aspectonan cu awendia ta vale la pena investiga ta cuanto diferente desperdicio nos por exporta, pasobra tin hopi mas industria, tambe den e paisnan grandi bisiña, cu ta specialisa den procesa cosnan manera glas, diferente metal, bateria, etc.  Ta necesario traha un plan berdaderamente integral, cu nos expertonan, asina leu cu nos tin, no tabata capaz di produci. No pasobra nan no por pero pasobra no ta permiti nan hacie. 
Atrobe nos ta mira nada mas cu cierto pasonan den pura y oportunista, moviendo e problema di Parkietenbos pa otro banda di caminda y laga Aruba cu e mesun problema.

LEAVE A REPLY

Please enter your comment!
Please enter your name here