Recientemente Sociaal Veiligheidsberaad, un plataforma caminda diferente instancia ta bini hunto y ta trece nan pensamento y asina hunto logra yega na e idea- y solucionnan concreto. E Sociaal Veiligheidsberaad a duna un presentacion di un metodo cu kier bay introduci, Multi-Dimensionele Familie Therapie (MDFT). Ta trata aki di un metodo di terapia sistematico pa e hobennan cu un of mas problema di conducta di cual principalmente problemanan di delincuencia of adiccion di substancia.

MDFT lo brinda un ayudo duradero na e famianan di e hobennan tambe, door di guia e famia pa na momento cu e hoben ser laga den libertad e por reintegra bek den e famia, caminda e famia mes tambe por yuda guia e hoben y asina evita cu e hoben ta cay bek den e mesun situacion y ta trece intrankilidad y tristesa na e su mes y famia.

Pa e metodo aki wordo introduci, seis terapista lo cuminsa e curso aki, pa asina brinda e servicio aki cual ta hopi necesario actualmente den nos comunidad. E opleiding lo tin un duracion di un aña, pues lo cuminsa na september 2022 y lo termina na juni di aña 2023. Profesionalnan di MDFT lo bin Aruba specialmente pa duna e opleiding aki na e seis terapistanan. E parti bon ta cu e metodo aki ta uno flexibel suficiente, cu por wordo adapta na e cultura di Aruba y sigur lo por yuda soluciona hopi casonan y trece nos hobennan den un bon direccion y brinda nos hobennan y nan famia speransa pa por tin un bunita biba.

Mi kier gradici Minister di Husticia y Asuntonan Social Sr. Rocco Tjon Minister di Husticia y pa mira e importancia di e metodo aki pa e bienestar di hogarnan na Aruba.