Lider di Fraccion di POR den Parlamento, Dellanire Maduro, a hiba su disertacion riba e tema di Enseñansa. E ta bisa cu e cartera di enseñansa ta uno cu tin di haber cu practicamente tur otro cartera den un gobernacion.

Educacion ta empodera e ser humano cu conocemento y habilidadnan pa sobrevivencia.

“Awe e topico cu nos ta atende ta regarda e situacion actual di enseñansa: Cu esaki nos ta papia, di cambionan den enseñansa y no por laga afo e efecto di e pandemia di COVID-19 riba enseñansa. Banda di tur e negativismo cu tin rond di e topico aki, por saca positivismo tambe”, segun Maduro.

E ta indica cu di forma abrupto enseñansa rond di mundo a haya su mes confronta cu cambionan. Por mira cu educacion digital den diferente categoria di enseñansa ta posibel durante e periodo di COVID-19, 49% di nos muchanan a logra haya educacion digital danki na e esfuerso di nos docentenan y mayornan, entre otro. Esaki a haci visibel cu ya caba nos por logra 49%, sin tin tur e preparacion cu lo desea di tin. Banda di esey lider di Fraccion di POR ta indica cu tin den e plan di educacion PEN2030 un plan di 10 aña unda un di metanan ta pa logra adkiri enseñansa a traves di un plataforma digital brindando acceso na un y tur. Esaki sin laga afo cu nos forma di enseñansa mester semper keda adapta na cambionan global cu ta tuma luga pa asina garantisa cu tin inclusion cual ta encera tambe studiante cu limitacion fisico of emocional y educacion cu ta adapta na e studiante pa e por desaroya su potencial.

Mirando e situacion den cual enseñansa ta pasando aden, Maduro a realisa un serie di pregunta na e mandatario encarga cu Enseñansa:

1. Con por garantisa cu muchanan semper lo tin acceso na scolnan cu ta bay cay bou di Stichting Protestant Christelijk Onderwijs Aruba (SPCOA) manera ta Pieterboer y Abraham de Veer mirando cu na e momentonan aki pa registra e stichting ta haci peticion di copia di protestants doopbewijs pa bin na remarca pa e procedura di seleccion. Kico ta minister su opinion di mas bien e scolnan cu ta cay bou di SPCOA bira scol Publico mirando cu na scol publico tin diferente tipo di religion caba?

2. E ‘Commissie van beroep’ ta wordo nombra door di stichting. Con por sigura na e maestronan di scol publico y stichting cu e comision aki ta onpartijdig mirando cu na Hulanda esaki ta un grupo independiente?

3. Kico por compronde bou di e ‘school model’, cuanto mucha cada klas lo tin mirando cu esaki ta diferente entre De Schakel y Colegio San Nicolas? Cua lo ta e toelatingseisen?

4. Con lo percura pa leerplicht durante e crisis? Cua ta e adaptacion, mirando cu tin mucha cu tin enfermedadnan cu no por atende scol, etc.?

5. Tabatin evaluacion previo di e edificionan (Werkplek verzoek), por ehempel si bentana ta habri, sin tin wasbak suficiente, lo adapta esaki? Ken lo cubri e costonan aki?

6. Ken ta controla cu scolnan ta cumpli cu e randvoorwaarden?

7. E concepto di randvoorwaarden di DVG di prevencion pa Covid tabata cla 1 mei y te 14 di mei esaki tabata disponibel riba website di arubaCovid-19.org. E concepto y version final ta identico. Comunidad tabata puntra varios dia prome riba e detayenan aki prome cu scol a habri. Lo tabata ideal pa duna un presentacion di e condicionnan (randvoorwaarden) pa scol habri durante conferencia di gobierno pa duna trankilidad na nos comunidad. Y anuncia durante conferencianan cua ta e scolnan cu ta habri y cua fecha.

8. Momento cu detecta un mucha cu sintoma cu por ta covid-19 lo duna muchanan mondkapje mientras mayornan busca su yiu for di scol?

9. Durante pauze ta bay percura pa muchanan tin distancia social? Si ta si con lo percura pa esaki?

10. Con lo percura pa brinda sosten pa scolnan, maestronan, mayornan y studiantenan por continua cu enseñansa den caso di un di dos wave di Covid-19? Kico ta e pasonan tuma y planea pa tuma luga si e reto aki presenta? Con nos ta percura pa nos ta miho prepara aunke nos no tin tur cos ‘in place’ pa duna 100% educacion digital mirando cu PEN2030 ta un plan di 10 aña?

Na final, Maduro a presenta un mocion unda ta urgi gobierno pa crea un plataforma nacional di ‘Dialogo Social’ a traves di cual por logra un consenso y union entre e diferente partnernan riba tereno di enseñansa y esaki a wordo aproba door di parlamentarionan di coalicion.

 

LEAVE A REPLY

Please enter your comment!
Please enter your name here