Parlamentario Endy Croes ta recorda cu diasabra awor 13 di Maart 2021 Aruba ta cumpli net un aña cu e prome 2 casonan di Covid 19 a wordo detecta na Aruba. Pues diabierna 13 di maart 2020 tabata e fecha oficial. Desde aki hopi cos a cambia. Un pais cu tabata den pleno recuperacion unda a logra converti un deficit di 444 miyon di e gobierno anterior (AVP) pa un Surplus di 46 miyon (2020). lamentablemente mester a haci ehercicionan rapido profundo y completamente nobo pa bringa e efectonan di e virus Covid 19.
Kico Gobierno a haci mesora:
Na e momentonan ey 100 otro pais na mundo ya tabata tin presencia di Covid 19 y tanto World Health Organization ( WHO) y RIVM di Hulanda tabata duna instruccionnan mediante protocolnan con mester atende cu e virus aki pa e no plama na un manera violento. E meta final tabata pa bo capacidad di salud no wordo poni bou presion unda no por atende cantidad di hende malo pareew y consecuentemente hopi hende lo a fayece. Nos por corda kico a pasa na Italia y Spaña. Mesora gobierno a introduci TDQ esta toque de queda, alabes a cera frontera pa 3 luna e famoso “lock down”, gobierno a introduci shelter in place y samenscholings verbod, a sera schoolnan y a prohibi bishita na Hospital, KIA, casnan di nos grandinan. Tur esakinan tabata strategianan di acuerdo cu protocolnan internacional pa combati proteha esnan vunerable y salvaguardia nos hendenan. Mesun momento a establese protocolnan pa hygiena entre otro pa hendenan laba man tur momento, mantene distancia di 1.5 meter y mas despues a hasi uso di tapa boca obligatorio. Ultimonan aki den combinacion cu e disciplina di henter nos pueblo tabata e jabi di nos exito.
A bin cu un strategia pa test agresivo:
Gobierno a ahusta su systema di test y a bin cu “search and destroy” esta test mucho mas hende pa dia na un manera agresivo cual a duna bon resultado. Den e promer brote desde Maart 2020 Aruba a jega maximo 101 caso. Finalmente a “crush the curve” dia 29 di mei 2020 unda nos a alcansa 0 caso positivo.
Gobierno a bin cu ayudonan di emergencia pa pueblo:
Gobierno a intoduci na un manera rapido compensacionnan entre ayudo y sosten financiero na pueblo y comerciantenan pa evita cu companianan chikito y mediano bati bancarota y almismo momento evita retironan masal. Pa esnan cu a perde trabou den covid 19 tambe a bin cu un ayudo di emergencia. Asina a bin cu FASE unda 11650 hende a hasi unso di esaki y casi 4000 te cu awe ta ricibiendo FASE. Loonsubsidie unda 25 mil hende a hasi uso di esaki y te cu awe rond 18 mil persona ta ricibiendo esaki. Sosten di 4000 pa kwartal unda 2500 compania inicialmente a hasi uso di esaki y te cu awe 1384 compania ta ricibiendo e ayudo aki. Alavez mester a hasi injecion di miyones den AZV y SVB pa nan no kibra. Un otro 3000 persona ta ricibiendo bijstand mientras 30 mil hende ta ricibiendo un cuminda pa dia. Rapport di IMF recien di 8 di maart 2021 na artikel 3 tambe ta menciona gran parti di esakinan den detaye y a aplaudi e forma con gobierno a reaciona y responde cu ayudo hopi tempran.
A maneha y sali for di e di dos y tres brote:
Inicio di Augustus despues cu a habri frontera y schoolnan Aruba a conose un di dos brote cu a inicia den nightlife na Aruba cual a peak te 1600 caso cu averahe di 75 positivo pa dia. Januari 2021 a conose nos di 3 brote despues di dianan di fiesta den december cual a peak te 624 caso. Actualmente Aruba ta maneha esaki rond di 200 caso total activo. Gobierno dia 13 di maart atardi pa 6pm lo tin un programa special dilanti bestuurscollege pa conmemora tur esnan cu a perde e bataya cu Covid 19 y a bay laga nos mientras 7pm lo tin un programa special cu por wordo sigui na television. Parlamentario Endy Croes kier manda su palabra di profundo condelencia na tur e famianan cu a perde un ser keri den e bataya cu Covid 19. Mi ta solidario cu Boso dolor. Cu Papa Dios lo manda e forsa y consuelo nesesario pa cada un di bosonan.
