“Mi tata semper tabatin bestia y nos a lanta cu nan for di chikito, patras di cas.” Marc Willems (25) ta un hoben Arubiano cu ta mantene un tradicion di hopi siglo pa cria bestia chikito, pero tambe galiña y baca. Algo cu ta impacta su vision riba kico ta bida.

Prome cu refineria, Arubianonan tabata sostene nan mes cu locual tabata produci riba e isla mes. No semper tabata suficiente. Pero particularmente den e area p’ariba di Hooiberg, hendenan tabata cria bestia, for di cabrito, carne te na baca. Otronan na Noord, y na Pos Chikito, tabata pisca. Desde cu refineria a drenta, particularmente y sigur despues cu turismo a haci su entrada. e demanda pa cuminda a aumenta y e facilidad pa cumpra cuminda di afo tambe a bira mas grandi.

Pues poco hende awendia ta lanta cu e idea di cria bestia na cas pa come. No pa Marc Willems, e hoben di 25 cu a cay bek na e hobby di su tata Robby y su welo pa cria su propio bestianan y asina sostene su mes y su famia chikito.

Marc ta un di e miles di Arubiano cu a perde trabou debi na e crisis di COVID-19. Pero en bes di desespera, Marc a haya consuelo den cuida e cabrito, carne, baca y hasta toro di famia, pa no papia di e chickenfarm chikito cu ta produci suficiente webo pa bende na escala chikito.

Marc Willems a lanta manera cualkier hoben comun na Aruba. Su mayornan ambos ta traha, su tata na aeropuerto y su mama na hospital. E memey di tres yiu, Marc y su ruman homber mayor tabata hopi den sport. Nan tabata hopi activo den competencia. Pero, tambe nan tabata activo cu nan tata, patras di cas pa cuida locual nan semper a haya como normal. Esta cu cura patras ta luga di cabrito, carne y galiña.

“Semper ma gusta. E ta distrae mi mente. Mescos ora cu bo ta den naturalesa, traha cu bestia ta duna hopi trankilidad di mente.”

Pero mientras cu su rumannan Dillon y Mariel a scoge pa sigui cu nan estudio, Marc a scoge pa bay traha, y nan banda, cuida e bestianan. Y awe, sin un trabou fiho, e no ta desespera, pasobra e pandemia di COVID-19 a ilustra e dependencia peligroso di Aruba riba importacion di cuminda. Y Marc tin e perspectiva cu e ta contribui na siguridad di cuminda pa Aruba.

Sosten pa criadornan

Si ta un cos e ta kere cu Gobierno mester haci ta yuda criadornan di bestia cu e facilidad pa por cumpra cuminda pa animalnan den un forma colectivo. Maishi y otro cuminda ta caro y si kier permiti mas criador di bestia logra, mester sostene nan cu tereno y e oportunidad pa cumpra e cuminda di bestia na un prijs mas abou. Marc mes ta cumpra cuminda specifico un biaha pa siman, ademas ta busca fruta y berdura cu a pasa nan tempo na supermercadonan y ta tuma yerbe di esnan cu ta chapi. Asina e ta percura cu su bestianan tin un variedad di cuminda.

En todo caso, pa Marc, e bida no ta duro. E sa cu e no ta manera hopi hoben di su edad cu ta sali y fiesta cu amigo. Hunto cu su famia, a scoge pa un bida mas simpel. “E animalnan ta duna mi hopi trankilidad. Mi ta sinti mi contento memey di nan.”

Di hobby pa negoshi

Pa Marc Willems comercialisa su actividad como criado, e mester cuminza cana e caminda pa registra su mes como un compania y asina cumpli cu tur rekisito. E ta considerando e paso aki, mirando cu pa por bende comercialmente, e mester tin su compania. Por ehempel.. E ta inscribi na Santa Rosa, pero pa por bira comercialmente activo, por ehempel den benta di webo, e mester tin su compania inscribi na Camara di Comercio. Awor e ta den e proceso pa planifica e siguiente paso aki. “E ta un hobby ainda. Mi no a enfoca pa haci’e mi negoshi, pero mi ta evaluando.”

Pero mientrastanto, e hoben ta sigui lanta mainta trempan pa duna su animalnan cuminda y awa. E ta un trabou di por lo menos 6 ora tur dia pa sigura cu e area ta limpi, pero tambe cu ta duna net e cantidad necesario di cuminda, “pasobra di otro manera, e animalnan por pak. No por laga nan come di mas.”

E mes ta gusta tur e animalnan cu nan tin. E cabrito y carnenan ta cana los den cura. Manera cualkier hende, e ta pega mas na uno cu otro. Por ehempel, ora cu mester cria un cabrito of carne cu tetero, pasobra e mama no ta haci’e. “Nan ta bira manera un bestia di cas e ora. Bo ta stima nan.” Pero realidad ta cu cierto momento, no por wanta tur y e parti duro ta pa haci distinccion cu e animalnan cu ta cria ta pa consumo. Di otro banda, su conviccion ta pa trata e bestianan cu ta cria na e miho forma posibel. “Nos no ta laga nan cana los, pasobra nan ta come mata di otro hende. Pero tin suficiente espacio pa nan, pa asina nan por move. E toro ta separa di e resto. E intencion ta pa busca tereno mas grandi pa asina e toro tambe tin mas espacio pa por haya mas luga pa por move rond.”

Reaccion di amigo

Locual ta yamativo ta e reaccion cu Marc ta haya di su amigonan. Mayoria ta admir’e y ta hasta bisa cu e ta parce nan un actividad cu no ta duna hopi stress. “Semper mi amigonan ta bisa mi cu mar’e nan tambe tabatin bestia pa cria.” Willems a bisa cu e por imagina cu pa e Arubiano di antes, locual e ta haci awendia no ta nada special. Locual ta haci’e special awendia no ta unicamente cu aki ta trata di un hoben cu ta dedica tur dia, sin excepcion pa cuida e animalnan, pero cu e tin cuminda fresco tur dia. “Mi por imagina cu nan tabata custumbra antes pa come cuminda fresco.”

Tradicion

Marc ta tata di un yiu muhe chikito cu ya caba ta custumbra di ta memey di tur e carne, cabrito, y galiñanan patras di cas. Pa e tata hoben, e ta contento pa mira con su yiu ta lanta manera e, den un tradicion di famia, un tradicion di Aruba cu danki na Marc y otro manera e, ta keda bibo.