Parlamentario Endy Croes ta splica di ultimo cifranan ricibi di canalnan oficial pa cu e ayudonan cu gobierno a duna desde 13 di maart 2020 te cu 31 di december 2020 durante e periode di Covid 19. Manera semper a bisa cu COVID 19 no a bin cu un manual pa Bo por sa con pa atende cu e crisis aki. Algo ta sigur cu a tuma e miho decisionnan posibel pa salvaguardia e salud di henter comunidad. Mientrastanto a inverti den e ser humano tanto via empresanan priva como den empleadonan directamente. Traves di Loonsubsidie, MKB steun esta e sosten na Middel en Klein Bedijf y tambe via FASE na esunnan cu a perde trabou.

339 MIYON inverti directamente den e ser humano:

Parlamentario Endy Croes a amplia riba e ayudonan aki. Un total di 42.8 miyon florin a wordo otorga via FASE tanto na empleado cu a perde trabou y ZZP’rs. Esaki a cubri un total di 11650 persona cu e ricibi e ayudo aki. Ultimo 3 lunanan di aña tin un averahe di 3500 persona cu ainda ta ricibiendo ayudo di FASE. Riba peticion por escrito di Fraccion di MEP na Conseho di Minister por ratifica cu tanto Loonsubsidie, MKB y FASE a keda extendi te cu maart 2021 cu posibilidad di un re-extension pa Juni 2021. Nos ta masha gradicido na e decision di Ministerraad aki. Pa locual ta e sosten “Middel en Klein Bedrijf” MKB Steun un total 24 miyon florin a wordo inverti desde e di dos te cu di cuater kwartaal.

Esaki ta un sosten di Afl.4000 pa kwartaal pa cada negoshi unda por yuda nan cubri gastonan di operacion. Un inversion di un averahe di 7 miyon pa kwartaal unda un averahe di 1800 compania a haci uso di esaki den 2020. Pa locual ta trata Loonsubsidie gobierno ta aporta cu alrededor di 60% na salario pa e companianan cu a haci e peticion aki tur luna desde mei 2020. Un total di 272 miyon florin a wordo inverti na salario pa sostene e companianan y mantene empleadonan na trabou. Averahe di 21000 empleado pa luna ta ricibiendo e sosten aki traves di Loonsubsidie. All by all Gobierno mediante su maneho a brinda un sosten di 339 miyon den aña 2020 al respecto e ayudonan akiriba menciona.

Esaki ta sin conta sosten di entre otro na Fundacion pa Nos Comunidad, Sociale Zaken via bijstand y gehandicapte uitkering pa nombra algun. Algo ta sigur cu efectonan di Covid 19 ta inmenso y e ayudo di gobierno ta gigantesco. Tur esaki mientras AVP a vota “CONTRA”presupuesto 2020 nengando e ayudonan pa un comunidad den necesidad. Aki rato nan lo bati na Bo porta pidiendo Bo voto. Tene cuidou! Danki na Minister Glenbert Croes cu a bringa pa FASE, Danki Minister Xiomara Maduro pa bringa pa Loonsubsidie y MKB Steun, Danki Minister Danqui Oduber pa e atencion inmenso den Salubridad, Danki na Minister Presidente Evelyn Wever Croes pa dirigi henter e Gabinete Wever Croes cu decisionnan crucial durante henter e Pandemia aki. Danki na nos frontlinersnan y tur nos profesionalnan. Hunto nos ta logra!