Parlamentario Endy Croes ta lamenta profundamente e actitud di AVP durante e reunion publico riba educacion. Diamars ultimo Barahamento a trata entre otro e inkietudnan cu tin den e field di enseñansa y a haci hopi pregunta pa asina por haya claridad. Al mismo momento Parlamento a aproba 5 mocion unda diferente tin di haber cu comunicacion y dialoga prome cu decisionnan final.

Aruba pasando den momento nan dificil:
COVID 19 a sorpresa mundo henter y a causa un impacto negativo enorme. Presupuestonan di tur pero tur pais rond mundo a cambia. Nada no ta mescos mas. No ta business as ussual. Financieramente esaki a impacta tur tereno desde Salud, Husticia, Social, Economia, Enseñanza pa nombra algun. Pues enseñansa ta un parti di henter e problema esta di e “big picture”. Cu tin disgusto den enseñansa ta bisto y cu Minister a haya oportunidad pa splica su maneho treciendo claridad y alabes a haci un compromiso cu Parlamento cu e lo dedica mucho mas tempo pa dialoga y comunica prome cu sigui tambe ta un hecho. Pues no ta tempo ( den crisis) pa busca problema sino hustamente busca solucion y bon comprondemento pa cu otro pa hunto nos saca e pais aki for di un problema grandi.

AVP a laga werksternan cay manera patia berde:
Partido AVP sinembargo a drenta e reunion cu un solo plan. No tabata tin boluntad pa mehoracion. Nan proposito tabata conoci den prensa hasta algun dia prome cu nan lo presenta un mocion pa manda e minister cas. Den e mesun reunion aki Parlamento a aproba un mocion sosteniendo 100 werksternan cu ta den problema cu nan trabou. Parlamento a pidi Minister pa NO manda ningun werkster cas y percura pa aloca fondo pa por sigui paga e werksternan y mantene nan na trabou. Votacion a sali 12 na fabor y 9 contra cual ta 9 Parlamentarionan di AVP. Parlamentario Endy Croes ta puntra. Ta kico e werksternan aki por a haci AVP? Ora di campaña Bo kier nan voto pero ora mester aproba mocion pa sostene y garantisa nan trabou Bo kier hunga politiek barata y laga tur cay manera patia berde. Dieptriest!

 

LEAVE A REPLY

Please enter your comment!
Please enter your name here