Parlamentario Endy Croes a tuma nota di un articulo publica bou nomber di Ir.Richard Frank cu ta un ingeniero na WEB. Cu asombro por tuma nota di e articulo aki unda Richard Frank , kende no ta politico, ta haci uso di un palabra cu un Lam ta guia un ciego insultando un gobierno ilustrando cu ta su so ta compronde e proyecto aki. Parlamentario Endy Croes mesora ta lansa e pregunta ta na ken Richard Frank ta referi? Kisas na su propio persona cu ken mas? Kisas cu su director? Nos mester separa cosnan for di otro y berdaderamente no mescla Bo profesionalismo cu politico. Nos lo respeta Bo riba Bo tereno pero momento Bo kier subi tereno di politica pa defende Bo opinion “propio y personal” riba Bienestar General di henter un pueblo nos mester duna nos banda di medaya cu expresionnan kisas fuerte.

WEB y Richard Frank e experto a gasta miyones :

Nos ta na altura cu e proyecto di LNG kisas ta manera un baby di Ir. Richard Frank. WEB na su turno a gasta miyones na companianan internacional manera entre otro K&M pa yuda skirbi ful un proceso di RFP. Paisnan den region cu a purba via e mesun manera aki cual nunca a logra concretisa e proyecto despues di gasta miyones ta Cayman Island na 2016, Bahamas na 2016 y 2019, Haiti na 2017, Curacao na 2016. Pues tin hopi pruebanan palpable cu e proceso y manera aki ta uno hopi costoso y complica cu no tur ora ta brinda e resultado positivo.

Proceso cu RDA a encamina ta dunando fruta hopi lihe:

RDA sinembargo a cana un diferente caminda via un comision independiente cu expertonan tanto internacional y local riba tereno di energia, comercial y huridico, y a cumpli na un manera transparente cu tur detaye. Desde 31 di Juli 2020 a habri tur e propuestanan den presencia di notario a logra firma na december ultimo Letter of Intent y na Januari 2021 a firma un exclusivity agreement cu Eagle LNG riba e proyecto di gas mientras nos ta anticipando cu prome cu final di maart lo firma un contracto oficial.

Beneficionan di EAGLE LNG:

Consul General y Consul Economico Americano staciona na Corsou na varios ocasion tabata na Aruba splicando cu Gobierno Americano ta para tras di e companianan aki tanto Eagle LNG como Quanten LLC y cu gobierno di USA ta “advocacy” ambos compania. EAGLE LNG tin e aprobacion pa exporta LNG gas aki. Prijs indicativo cu Eagle LNG ta ofreciendo ta uno hopi competitivo mas barata cu Puerto Rico y Jamaica ta hayando como ehempel. Eagle lo continua cu mas proyecto cual ta un bunkerstation unda barconan tanto crucero y tur otro barconan den futuro cercano cu ta core riba gas lo por pasa “tank” gas na Aruba. Eagle LNG tin actualmente Talleyrand LNG Bunkerstation un “first of a kind state of art” LNG Bunkering Facility na JAXPORT Jacksonville Florida y ta experencia den esaki. Aruba lo expande su economia cu e vision di gobierno cristalisando esaki. Eagle LNG lo exporta LNG desde Aruba pa region y alaves si logra proyecto di refineria cual ta usa 6 biaha mas volume cu WEB, Eagle lo ta central den esaki pa feed gas pa un refineria cu lo core hopi mas limpi. Tur e volumenan aki lo tene cuenta cu nan unda mas volume miho prijs Aruba lo haya den futuro. Lo garantisa stabilidad y rebaho di prijs di awa y coriente momento RDA yega na un acuerdo cu WEB. Pues tin asina tanto beneficio pa Aruba unda Bienestar General mester prevalese riba interes personal of di un grupo di hende. Ta momento pa sigui vision di gobierno y no ta momento pa keda papia mas pero momento pa tuma decisionnan corecto moviendo padilanti Parlamentario Endy Croes ta finalisa bisando.

LEAVE A REPLY

Please enter your comment!
Please enter your name here