Parlamentario Endy Croes a splica cu siman pasa Fraccion di MEP a haci un bishita oficial na Banco Central. E topico riba agenda entre otro tabata e Ley pa proteha consumidor. Kico esaki ta encera? Na Hulanda y otro paisnan rond mundo tin un Ley cu ta proteha consumidornan contra interesnan desproporcional.

Por ehemplo, momento cu Banco pa algun rason no duna un prestamo na un ciudadano e persona aki ta bay presta na otro instancianan cu ta brinda prestamo na un interes mucho mas halto. Asina ta existi otro companianan cu ta presta producto na interes sumamente halto. Tin cu ta alcansa 600% ora bo calcula esaki.

Otro tipo di negoshi ta esnan cu ta tuma un producto di e persona a cambio di placa. Asina tin un variedad riba mercado.  Pa e rasonnan aki hopi biaha e conciudadano inocente ta cay den un spiraal di problemanan financiero y social.

E ley aki hustamente ta pa proteha e conciudadano pa cay den gara di un servicio cu interes desproporcional. Sinembargo ta importante pa tene e portanan habri pa e famianan humilde por bin na remarke pa prestamo nan chikito esta (micro lending) cu reglanan hancra den Ley na bienestar di e homber chikito. Lo introduci por ehemplo un krediet register cu tur compania cu ta brinda servicio di presta placa, presta producto of ta cambia producto pa placa mester bay cay bou di dje. Esaki lo yuda brinda e proteccion na e conciudadano.

Banco Central a brinda Fraccion di MEP un presentacion di e Ley cu Banco Central a traha cu diferente experto unda a revisa entre otro e ley existente di Hulanda. Corsou y Bonaire tambe tin e Ley aki in place unda Corsou por ehempel a “settle” na 25% maximo na mientras. Bonaire esaki ta 23% maximo incluyendo tur gasto inclui esta APR (Annual Percentage Rate). Di acuerdo cu informacion Minister di Finansas a ricibi un presentacion y e ley aki actualmente ta na gobierno unda tin un conseho di Raad van Advies caba riba dje.

Fraccion di MEP lo manda un carta pa Minister e siman entrante pa por adkiri poco mas informacion riba e ley aki y pa por tin un fecha tentativo cu esaki por ta yegando Parlamento y pa asina Parlamento por schedule su rondanan di consulta cu stakeholdersnan. Unabes pasa door di e proceso aki Presidente di Parlamento lo stipula un fecha pa e ley por wordo trata y asina Aruba tambe lo tin un ley pa proteha consumidornan mescos cu gran mayoria di  paisnan rond mundo.

 

LEAVE A REPLY

Please enter your comment!
Please enter your name here