Segun sra Arends- Reyes ta tur dia Aruba ta wordo confronta cu casonan cu ta pasa cu tin muchanan chikito of menor di edad envolvi. Un di e recomendacionnan di Unicef y tambe importante pa Aruba como pais den reino tawata pa Aruba tin un ley di crèche of centro di cuido.

Curaçao, Bonaire y Hulanda tin y aki Aruba ta wardando ainda pa gobierno anuncia un fecha cu e lo bin na vigor.  Na juni aña 2017 cu ta casi 2 aña pasa Parlamento unanimamente a pasa un ley caminda cu nos centro di cuidonan di mucha lo mester tene consideracion cu diferente aspecto, no solamente di higiena tambe di siguridad, desaroyo social emocional, guia y infrastructura. Tin un lapso di tempo mara na e rekisitonan y tin algun rekisito basico ta drenta di biaha na vigor y lo mester conta pa tur centro di cuido di mucha. Tur dia ta drentando keho pa locual ta trata situacionnan na centro di cuido di mucha directo of indirectamente na instancianan. Y e pregunta ta si ta actuando riba nan prome cu un incidente mester pasa. Na Aruba no mester di permiso/vergunning pa por habri un centro di cuido pa 5 of mas mucha pues basicamente e tarea di mayornan ta importante pa sondea bon unda y cu ken nan yiu ta kedando y si e establecimento ta apto of tin riesgo pa muchanan. Mirando e cifranan alarmante di negligencia, maltrato y abuso di mucha leynan asina no mester wordo warda den lachi, si e minister encarga di Enseñansa no ta acuerdo cu e ley cu a ser aproba na 2017 cu ta traha cu registro y vergunning, e minister mester percura pa bin cu otro proposicion, pero ta tristo y iresponsabel pa Aruba keda sin un cuadro di ley pa cu centro di cuido di mucha, despues cu a tarda hopi aña pa a logra yega na un proposicion cu a pasa unanimamente den parlamento.

Hopi centro di cuido lo por cumpli cu e guianan pa un crèche di calidad pero tin hopi tambe cu tin mas cu 5 mucha, ta na cas di hende,e muchanan ta coriendo diferente risico, e luga no ta registra y basicamente ta clandestino. Asina ta tende di casonan di centro di cuidonan na cas di personanan caminda tin mas familiar ta biba y bishita cu por ta un risico grandi pa e muchanan. Algun tempo pasa Departamento di Salubridad a laga sa cu nan lo ta bishitando diferente centro di cuido, pero no a tende mucho mas al respecto. E topico aki mester di su atencion y mirando cu mester un cuadro di ley vigente pa nombra un inspector encarga cu e centronan di cuido di mucha, e ta importante pa minister laga sa ta kico ta su intencion pa cu e topico aki. Sra Arends-Reyes a comprende cu e ministerio di Enseñansa a percura pa 240 mil florin pa bay sondea e posibilidadnan pa decriminalisa e cultivo di cannabis pero a schuif e postnan di training pa leidster di crèchenan pa e sociaal crisis plan cu por cierto ta pidi un lista di aki te Tokyo prome cu pone e fondonan pa e proyectonan disponibel y ta poco poco e proyectonan y fundacionnan cu antes tawata resorta bou di ministerionan lo por haya nan placa. Asina por wak cu tin un ineficiencia enorme y miyones di fondonan publico cu ta keda den pot cu te ainda no ta yegando nan destinacion. Aruba ta birando dia pa dia mas caro y tur dos mayor mester traha  y laga nan yiunan na un centro di cuido di mucha. Tin varios dunado di trabou ta duna un toelage pa yuda paga crèche y tin un mocion aproba 2 aña pasa cu ta pidi pa mayornan of dunado di trabou por deduci fiscalmente e ayudo pa paga centro di cuido di mucha. E mayornan mester por traha trankil cu nan yiunan ta den bon man, asina tambe e ta yuda contribui na nos productividad laboral na Aruba. Cada caso di abuso, maltrato y negligencia ta un di mas ariba nos isla y den e caso di implementacion y control pa e centro di cuidonan awor aki ta den man di gobierno sra. Arends-Reyes ta termina bisando.