Parlamentario Setty Christiaans-Yarzagaray (MEP): ‘Consumidor tin mas confiansa y expectativa di situacion financiero di gobierno actual’

Banco Central a emiti recien resultadonan basa di nan investigacion di Confiansa di e Consumidor. Segun e rapport ultimo, cu ta pa kwartaal 1 di 2019, ta indica cu e confiansa di consumidor total a baha di 97.0 pa 95.8 for di kwartaal 4 di 2018 pa kwartaal 1 di 2019. E encuesta aki ta midi sentimento di e consumidor total pero tambe diferente componente cu ta suma na confiansa total di e consumidor.

En berdad e cifra total di confiansa di consumidor a baha un poco, pero mester remarca cu ora analisa tur componente cu e consumidor ta husga, varios componente en berdad ta baha, tin ta keda mescos y tin cu ta subi tambe. Aki por nota cu consumidor su confiansa riba financia di gobierno actual a subi.

Ora haci consumidor e pregunta cu ta cay bou di situacion actual, e ta pensa cu situacion financiero di gobierno a subi pa e prome kwartaal di 2019 compara cu e ultimo kwartaal di 2018, respectivamente di un rating di 93,3 pa 96,7.  Tambe ta haci e consumidor pregunta riba su expectativa y ta dun’e e oportunidad pa rate algun componente den e categoria aki. Aki mester nota cu e consumidor su expectativa riba e posicion financiero di gobierno a mehora. Por nota cu pa kwartaal 4 di 2018 e consumidor su expectativa tawata 97,0 y pa e prome kwartaal di 2019 esaki a subi na 99,0. E ultimo parti aki riba su mes ta un bon noticia pa gobierno di Aruba, segun parlamentario Setty Christiaans-Yarzagaray.

Como parlamentario cu ta sigui desaroyo en general di cerca y ta sigui tambe gobierno su maneho, por bisa cu pa loke ta trata e parti financiero ta bayendo den bon direccion. Consumidor mes ta duna un rating na esaki y e encuesta di Banco Central aki ta un prueba cu e sintoma cu ta wordo sinti cu situacion financiero di gobierno ta bayendo den miho direccion.

“Pa mi como parlamentario e informacion aki ta hopi importante mirando cu no solamente nos como parlamento, sino consumidor tambe tin e sentimento y un bon perspectiva cu Gobierno actual ta tumando su responsabilidad na serio y ta haciendo su esfuerso pa drecha situacion financiero cu e la hay’e cu ne”, parlamentario Setty Christiaans-Yarzagaray a duna di conoce.

.