Segun sra Arends-Reyes locual cu tawata remarcabel durante e manifestacion di maestronan ta e prome reaccion di parti di gobierno, cu lamentablemente nan no por salba Enseñansa di tur e reduccion di gastonan. Mesora e vocero di e grupo di maestro a contesta cu nan ta den accion atrobe pa motibo cu nan ta sinti cu banda cu tin reduccion di gasto den Enseñansa, nan ta sinti cu nan voz no ta yega na gobierno, ta parce cu no tin oido pa nan preocupacionnan.

Dos aña a pasa cu e coalicion di MEP POR RED ta gobernando pais Aruba y e incertidumbre ta crece cada dia mas bou di pueblo incluyendo maestronan. E maestronan a manda for di diferente grupo cartanan di preocupacion cu a wordo atendi via reunionnan na MFA, den comision y durante tratamento di presupuesto, fraccion di AVP a percura pa pone nan preocupacion den mocion cu a wordo aproba pa Parlamento como señal pa gobierno. Y na ningun ocasion gobierno no a scucha ni di maestro ni di Parlamento y a dicidi di sigui cu nan plannan na fin di manera ta e caso di Centro Multi Disciplinario, MDC. Te ainda nan ta sigui busca nan derecho pa ser scucha y haya cita pa trece nan preocupacionnan dilanti pero ta parce di ta envano. Tin hopi punto treci dilanti cu no tin ki haber cu placa pero ta mas enfoca ariba e parti di ehecucion di plannan y participacion di maestronan. E excuus cu awor despues di 2 aña di gobernacion ta corta den Enseñansa despues cu a prefera inverti 340 mil na e tema di cultivo di cannabis cu te ainda nada concreto no a sali afo, bou di e cartera di Enseñansa, a aumenta e gastonan di gobierno cu 100 miyon y awor ta core cabes di gai pa busca surplus for di pueblo.

E manera di traha cu e dos partidonan MEP y POR di coalicion tin man habri pa proyecto, innovacion, social, gasto y traha centro correcional nobo cu tur ta aspectonan importante pero ta correctivo siendo cu ta prefera pa pone e partido cu un asiento corta den Enseñansa. Mescos cu ta busca diligentemente fondonan miyonario pa alivia e situacion di inmigracion tambe lo por a inverti mas esfuerso den busca fondonan cu tin disponibel afo pa proyectonan na beneficio di Enseñansa mescos cu e 13,6 miyon Euro cu a logra bou di e gobierno di signatura berde y a logra cu fondonan di Onderwijsfonds. Enseñansa den un pais mester traha preventivo y mester stimula mobilisacion social y su beneficionan y inversion pa su pais lo conoce despues di algun aña. Ta parce cu e presion pa reduccion di gasto ta grandi riba Enseñansa y no ta mucho notabel y ad hoc den e otro carteranan. Nos maestronan na Aruba ta eherciendo un trabou asina importante pa futuro di nos pais y e presion cu ta poniendo ultimo tempo ariba Enseñansa ta sumamente inhusto, mester percura pa trece solucion y trankilidad mas pronto cu ta posibel sra. Arends-Reyes ta termina bisando.

1 COMMENT

LEAVE A REPLY

Please enter your comment!
Please enter your name here