Processed with MOLDIV

Segun sra. Arends-Reyes e calidad y accesibilidad di opvang of centro di cuido di muchanan y hobennan mester keda halto ariba agenda. Na momento cu pais Aruba conoce 1 di cada 5 cas cu ta cay bou di e categoria cu ta pasando pobresa, ambos mayor ta traha, na momento cu Aruba conoce 24 caso di un of otro tipo di abuso di mucha pa luna y 150 caso di abuso domestico pa luna!

Y tin 18 miyon pa aña disponibel pa yuda combati entre otro e tematicanan y ta solamente 3 di e 31 proyectonan ta mustrando avance significante y mayoria di e fondo no ta yega su destinacion nos tin un problema serio. Aruba conoce ley di 2017 cu ta na beneficio di e bienestar y proteccion di nos muchanan cu ainda no por bin na vigor pa motibo cu no kier apunta un inspector, tin plannan nobo, fondonan disponibel pa ehecuta plannan y proyectonan na beneficio di nos muchanan y ta tuma nota cu por ehempel di 156 mil florin disponibel ta 38 mil florin so ta wordo uza pa promocion y biahe solamente pa por ehempel proyecto manera Opvoedvisie, proyecto di mester haya subsidio manera voor en naschoolse opvang ta den cora, no ta yegando na e fondonan. Si tin asina hopi melding y necesidad pa e tema di kindermishandeling dikon nan no ta yegando na e fondonan. E uitputting di e fondonan aki no ta bayendo bon, y tum’e como un critica constructivo pa e gobierno aki, mester bay wak di cerca dicon e fondonan no ta yegando na e destinacionnan, si nos ta den un crisis manera cu e situacion ta mustra, no por sigui presenta Parlamento cu cifranan y tabelnan insuficiente asina, mester tuma mas accion.

No ta sra. Arends-Reyes ta bisa, ta e resultadonan ta papia pa nan mes, tin demasiado proyecto cu no ta yegando na nan fondo y den e tempo cu ta transcuri e situacionnan no ta wordo alivia. Ta comproba cu si no inverti den ‘early childhood development’ y aplica ‘early childhood intervention’, pa ora cu kier bay haci diferencia den bida di hobennan y adulto ta un trabou cu di chikito mester a cuminsa cune. Mas muchanan y hobennan riba caya sin nada di haci ta busca otro cos di haci cu hopi biaha ta termina ta un problema pa nan mes, famia y sociedad. Cuminsando pa acceso di Enseñansa, proteccion, cuido di calidad, acceso pa programanan despues di orario di scol, no cu e lista di espera ta bira 2 aña pa ora bo yega na beurt, casi cu no mester mas. Di edad crucial di 1 pa 5 aña muchanan mester di hopi nutricion, cuminda cu ta aporta na nutritientenan y vitamina, manera cu costo di bida a subi na Aruba cu 18% pa alimentacion, fruta y berdura a bira un luho pa famianan na Aruba. Mester sigui busca un solucion pa trece fruta y berdura di calidad y prijs rasonabel pa Aruba. No mester bagatelisa e importancia di nutricion pa nos comunidad, e aspecto preventivo di asina hopi malesa. Si introduci un sugar tax ainda e productonan aki ta keda mas barata cu fruta, berdura y proteina pues mas lihe lo mester recuri na nan. Si muchanan mester biba den un cas cu tin hopi discordia pa motibo cu mayornan mester traha y tin hopi violencia domestico y no tin pas na cas y tin influencia grandi ariba nan bienestar psycho-emocional, scolnan mester ta e luga cu ta brinda nan e siguridad, guia y apoyo cu nan mester. Trahado nan social na scolnan, segun e reportahe di gastonan nan fondonan ta disponibel ainda practicamente intacto, esaki no por. Hopi di e proyectonan of fundacionnan cu ta den e Sociaal Crisis Plan no ta nobo, tur tawata cay bou di un departamento di gobierno y tawata haya nan fondonan. Awor tin mas rekisito pa yega na e fondonan y por conclui cu e ta bayendo den un ‘slow pace’ y lo mester averigua wak ta con por acelera e proceso pa no perde e meta final for di bista. Crèchenan mester un inspector, tin fondo disponibel pa bureau leerplicht, Traimerdia mester continua y mester conoce ampliacion. Nos Atardi cu ta un programa despues di scol pa alumnonan di scolnan secundario tambe tin necesidad pa continuacion y ampliacion. E inversion den nos muchanan y hobennan ta uno valioso no ban perde e oportunidad di tin e fondonan disponibel y pa e no yega su destinacion. Tin suficiente departamento y experto cu sa con pa pone e fondonan aki na bon uzo y lo mester evalua si e forma cu ta presentando nan ta efectivo y sostenibel pa den futuro cu ta un pregunta legitimo cu den e mesun reportahe di e plan ta menciona y subraya sra. Arends-Reyes ta termina bisando.

 

1 COMMENT

  1. Dicon ora boso ta den Gobierno educashon no ta importante: a uza placa pa traha HAVO/VWO na Noord pa core un tram pa “capricho” di un grupo di amigonan cu ta beneficia: crusificando un pais luchando pa educa su yiunan. Semper mes cos, tin bon idea ora ta afo: laga e Gobierno actual traha poco, hinca placa den caha, boso sinta atrobe y green parties continua.

LEAVE A REPLY

Please enter your comment!
Please enter your name here