Parlamentario Marisol Lopez-Tromp(POR): ‘Situacion di Venezuela a haya hopi atencion den reunion di IPKO’

ORANJESTAD – Siman pasa lider di fraccion di POR den Parlamento, Marisol Lopez-Tromp tabata parti di e delegacion di Aruba presente na e reunionnan di IPKO, e encuentro interparlamentario di Reino Hulandes, cu a tuma luga na Sint Maarten.

A atende varios punto di interes pa e partnernan den Reino, manera entre otro e metanan di desaroyo sostenibel, Statuut, relacionnan den Reino, problemanan y posibel solucionnan, geschillenregeling, pero sigur e punto na e momentonan aki mas importante pa nos tabata e situacion di Venezuela.

Lopez-Tromp a indica cu e delegacionnan a intercambia di opinion na un manera intensivo riba e situacion di migrantenan legal y ilegal for di Venezuela cu ta yegando e partinan di Caribe Hulandes, specialmente nos islanan di Aruba y Corsou. E situacion aki ta uno preocupante y a haya e atencion necesario durante e reunion na Sint Maarten.

E delegacionnan ta di acuerdo cu e situacion aki ta uno preocupante y tin e atencion di e parlamentarionan den cada un di e paisnan di Reino Hulandes, specialmente mirando e consecuencianan grave cu esaki tin pa loke ta e sectornan social, financiero y otronan pa e comunidadnan. Esaki sin menciona e imagen internacional di e islanan pa loke ta e situacion aki.

E preocupacion mas grandi pa e participantenan di IPKO den e situacion aki di migrantenan Venezolano ta cu ta di gran importancia pa e gobiernonan di e cuatro paisnan di Reino sigui busca conhuntamente posibel solucionnan  specialmente pa Aruba y Corsou.

Marisol Lopez-Tromp a splica cu den e palabracionnan haci entre e participantenan di IPKO a keda indica cu pa logra cu e representantenan di pueblo por realisa nan tarea di control na un bon manera, cu nan lo informa otro mas frecuente riba e situacion actual di nan pais, riba e posibel solucionnan cu ta wordo palabra of riba peticionnan concreto di ayudo y sosten di nan gobiernonan. Tambe e delegacionnan a indica cu nan lo desea di tin mas datonan posibel riba e diferente aspectonan pa atende e situacion aki. A base di e intercambio di informacion y datonan concreto aki, e parlamentarionan lo realisa nan respectivo gobiernonan diferente pregunta riba e maneho cu ta of lo wordo hiba.

E parlamentario di POR ta indica cu e ultimo punto aki ta hopi importante teniendo na cuenta e peticion di tanto Aruba como Corsou pa medio di Reino, pa forma parti di e programa di Union Europeo cu ta sostene e paisnan na Sur America cu ta wordo confronta cu un cantidad di migrantenan y refugiadonan Venezolano, manera ya caba a wordo palabra door di Aruba y Corsou den cuadro di Eurolat. Esaki ta conta tambe pa otro posibel programanan internacional cu tin e mesun intencion cu esun di Union Europeo.

Finalisando, Marisol Lopez-Tromp a indica cu lo sigui atende cu e situacion di crisis di Venezuela internamente y tambe den cuadro parlamentario y e lo bira un di e puntonan di importancia den e siguiente reunion di IPKO.

You May Also Like

‘Dowers mester bira homber y stop cu su politica di shishi’

Siman pasa parlamentario Endy Croes a baha fuerte riba Dowers momento cu den un ...

‘Tur Partido ta papia di castigo minimo sin considera e problema riba su mes’

Castigo ta keda importante, sea ta castigo maximo of castigo minimo.Na final di dia, ...

‘Parlamento critico y sociedad critico ta complementa otro’

Parlamentario Sue-Ann Ras (MEP) no tin miedo di cuestiona coleganan den fraccion.  “Nos como ...

‘Hendenan cu a yora cu Otmar Oduber, awe e mes ta manda cas sin trabou’

Miembro di fraccion di AVP den Parlamento, Benny Sievinger a manda palabranan di bon ...

‘Con IMF a spierta gobierno di AVP for di 2013?’

Dialuna ultimo den conferencia di prensa di Fraccion di MEP, parlamentario Setty Christiaans-Yarzagaray a ...