Parlamentario Melvin Tromp (AVP): ‘Gobierno ta usando fraccionnan di coalicion manera un grabbelton’

ORANJESTAD – Un biaha mas a keda demostra siman pasa, cu esun cu ta manda den Parlamento, ta gabinete Wever Croes, cu ta dicidi ki ora tin reunion, riba kico tin reunion y ta pone miembronan di e fraccionnan cu ta sostene gobierno, pasa pa muchanan manda cu pa colmo no tin nocion kico nan tin cu haci of no haci.

Melvin Tromp vocero di AVP ta mustra cu siman pasa gobierno a dicidi di bin Parlamento pa duna informacion relaciona cu e comision di supervision financiero caminda en realidad no a bin algo nobo dilanti y cu gobierno ta esun cu tin cu dicidi kico ta bay pasa cu e ley di CAFT nobo.

“E falta di seriedad di e gobierno di coalicion a bolbe refleha su mes un biaha mas ora cu practicamente no a duna Parlamento ningun informacion valido riba e ley nobo di CAFT y kico lo bay pasa dentro di algun siman ora cu e ley aki yega Parlamento.

E solo hecho cu secretario di estado Knops a declara cu pa dia 22 di april proximo e ley aki lo keda cla y aproba, ta mustra cu na Hulanda ya no tin mucho cos pa papia ariba, ya cu gabinete Wever Croes ya a bay di acuerdo con e ley aki tin cu bira ya cu tin un acuerdo firma caba cu gobierno di Reino.

E falta di seriedad a manifesta su mes ainda mas ora cu den oranan di atardi ni un quorum e tres fraccionnan por a logra pa e reunion y tur loke minister di finansa y minister presidente a bin duna na informacion, en realidad no ta duna ningun claridad riba e ley nobo aki con e comision di supervision lo sigui funciona ora cu e keda presenta na Parlamento.

Na final di e reunion fraccionnan cu ta sostene gobierno a dicidi di presenta un mocion den cual nan ta urgi gobierno pa manda informacion of un concepto di e ley aki pa Parlamento haya mas claridad kico esaki lo bay bira y con esaki ta hinca den otro.

Sinembargo ya caba gobierno di Reino tin acuerdo cu gabinete Wever Croes riba e particularidad aki y ta tristo cu ainda gobierno no a permiti ni su propio fraccionnan den parlamento, un bista di contenido di e protocol cu a wordo firma na 2018 cu ta permiti CAFT sigui cu su trabou di supervision pa cu presupuesto 2019.

En realidad e fraccionnan den Parlamento ya ta wordo poni ‘buitenspel’ ya cu tin un protocol caba firma pa prome minister Evelyne Wever Croes y pa minister di finansa Xiomara Ruiz Maduro caminda ya gobierno a acepta e condicionnan bou di cual nan lo sigui traha cu CAFT y fraccionnan cu ta sostene gobierno por ‘bula riba bula ’bou ya cu hasta gobierno a priminti gobierno di Reino cu pa dia 22 di april e protocol aki lo pasa pa bira e ley nobo bou di cual CAFT lo haci su trabou proximo añanan di e gabinete aki.

Fraccionnan a presenta un amienda caminda den forma contundente a bolbe keda demostra cu nan no tin control riba nan gobierno, cu nan ta un stempelparlement di prome ordo y tin cu haci loke gobierno dicidi y den e caso aki ya gabinete Wever Croes a dicidi hunto cu Hulanda caba kico tin cu bay pasa of ta pasando caba.

Fuera di a wordo converti den un grupo sin poder algun riba un gobierno cu nan tin cu controla, e tres fraccionnan aki ta parce un grabbelton cu ningun sa kico ta bay pasa cu nan, pero ta gobierno ta esun cu ta hinca man y dicidi kico nan tin cu haci,” Melvin Tromp di partido AVP a declara.

 

You May Also Like

‘Pregunta haci na prome minister riba contrabanda di oro di Venezuela’

Parlamentario di fraccion di AVP, Robert Candelaria a mustra cu ya pa algun tempo ...

Parlamentario Benny Sevinger(AVP): ‘Aruba tin un gobierno cu ta gobernando sin pia ni cabes’

ORANJESTAD – E situacion di ciudadanonan Venezolano cu ta bin pidi asilo na Aruba, ...

Mike Eman contento cu CDA su programa pa union Europeo

ORANJESTAD – Recientemente ex brommer minister Mike Eman y lider di AVP tabata huesped ...