Parlamentario Mervin Wyatt-Ras(AVP): ‘E gobierno aki ta critica gobierno anterior di Mega Debe mientras e mes ta haci Mega Gastonan’

ORANJESTAD – Parlamentario, Mervin Wyatt-Ras durante conferencia di prensa semanal di partido AVP a trece padilanti cu gobierno ta carece na vision pa loke ta nos grandinan y nan necesidad.

Despues di presenta un ley y haya sosten di Parlamento di coalicion pa kita e reparatietoeslag pa cierto grupo di entrada, e minister ariba su mes a dicidi pa no tene cuenta cu ley y paga e suma aki di reparatietoeslag. Dicho toeslag originalmente gobierno di AVP a introduci. Awor gobierno ta duna AVP razon pa paga reparatietorslag. Dia cu a bulldoze e ley aki na fin di aña, fraccion di AVP a presenta un amienda pa no kita e reparatietoeslag sin embargo parlamentarionan cu ta sostene e coalicion a vota en contra di e amienda y awor e minister ta bin cu otro decision ariba esey y pues no ta cumpli cu loke e mes a bulldoze y cu su coleganan na soño a sostene. Kisas na momento cu fraccion di AVP a trece e amienda padilanti tampoco no kier a duna credito na fraccion di AVP. Wyatt-Ras ta haya positivo cu nos pensionadonan ta keda ricibi e suma aki cu AVP a otorga nan tempo di gobernacion di gabinete Eman. E preocupacion cu ta surgi ta di unda ta bay saca e placa aki bek pa e gobierno aki por cumpli cu loke nan a palabra cu CFT.

Paso e gobierno aki di un banda ta haci comosifuera nan ta social y ta presenta un plan social pa esunnan den dificultad y di otro banda ta bin cu medidanan cu ta afecta y corta profundo den esunnan vulnerable den nos comunidad. Wyatt-Ras ta trece padilanti cu ora bo drenta un supermarket tur hende ta keha. Esnan cu tin menos den nan cartera awor en bista di tur medida no ta “kom rond” mas cu esaki. Prijsnan di comestibel a subi drastico. Pa colmo gobierno a bulldoze un ley prome cu Pasco entre otro pa comerciantenan no pone loke nan ta cobra na BBO mas riba recibo, sino nan ta haya boet. Esaki lo haci cu ta bira intransparente cuanto e consumidor ta paga na belasting riba productonan. Esaki ta un abuso dirigi na nos pueblo.?Wyatt-Ras y su fraccion ta desaproba esaki y  ta di opinion cu mester kita tur otro medida cu gobierno a tuma riba nos pueblo. Dicho placa no ta bay pa paga Mega Debe manera e gobierno aki kier laga nos pueblo kere sino pa paga Mega Gastonan di luho di gobierno y su friends and family.

Esaki tanto Raad van Advies como CFT tambe ta indica cu na luga cu gastonan a baha nan a subi. Gobierno a tuma varios medida pa complace cu CFT, sin embargo awor cu gobierno lo paga e reparatietoeslag na pensionadonan nan lo busca e placa aki di otro forma y lo saca e placa aki for di nos mesun pueblo na un otro forma. Paso CFT sigur lo pone presion ariba gobierno pa pone e suma aki bek den presupuesto. Ta nos hendenan lo tin cu bolbe entrega. Nos hendenan ta fada di e situacion aki. Gobierno na luga di yuda nos hendenan pa sobrevivi diariamente cada biaha ta keda corta den nos hendenan. Esaki no ta un situacion husto u ta in abuso. Esunnan cu tin cu traha duro y esunnan cu ta biba di un salario minimo no ta “kom rond”  mas cu e salario aki. Nan no ta resta suficiente medio financiero pa paga gastonan y actividadnan pa nan famia y nan yiunan, paso tur comestibel y otro producto a bira mas caro, incluyendo awa y coriente. Loke ta inhusto ta ademas cu e placa cu ta kita di nos hendenan no ta ser inverti den paga debe manera cu gobierno ta gaña nos hendenan sino pa paga pa Mega Gasto pa cumpra productonan di luho pa gobernantenan manera biahenan lucrativo, autonan di marca ultimo modelo y caro y poniendo famia y amigonan na trabou y hasta den puestonan clave. Recientemente un colega di fraccion di AVP a presenta un bista di e tantisimo biahenan di ministernan di coalicion cu casi no ta para na Aruba. Tur hende ta ripara cu den e gobierno aki tur cos ta smal pa pueblo y hancho pa gobierno y su famia y amigonan. Placa di pueblo ta bay pa gozadera di gobierno y esunnan rond di dje. Nos di AVP ta para  banda di nos hendenan cu anterior tabatin un miho bida y unda cu nos pais no tabatin mucho diferencia entre esunnan rico y pober y cu por a yama nos hendenan hasta “verwend” pasobra nos hendenan tabatin placa den nan cartera pa gasta, sin embargo e medidanan a afecta nos hendenan masha hopi mes. Gobierno aki mester stop di gaña cu ta paso gobierno anterior a haci debe nan tin cu tuma medida. Paso e gobierno aki no ta pagando debe sino ta gastando placa sin limite.

Wyatt-Ras ta wanta su curason pa mas medida y pa a subida di accijns cu lo afecta nos turismo. Ya turistanan ta keha cu Aruba ta caro y door di subida di accijs riba alcohol, hotelnan lo bira mas caro, aunke nan lo busca nan productonan di exterior y esunnan cu lo ser perhudica ta nos comerciantenan local. Tambe restaurantnan lo sufri unda cu nos hendenan local cu tin restaurant lo no bay sobrevivi manera antes. Segun drs. Wyatt-Ras gobierno di coalicion tin cu “bezin” of refleha y organisa un “retreat” pa nan  pa wak kico nan ta haciendo cu nos pais. Gobierno mester refleha pa wak kico berdaderamente ta haci pa hisa calidad di bida di nos hendenan. Nos hendenan mester ta central. Gobierno mester “walk su talk” y pone nos hendenan, tambe esunnan den necesidad na prome luga enbes di famia y amigonan.

You May Also Like

Diaranson lo trata presupuesto complementario 2017

Diaranson awor parlamento lo trata e ley di presupuesto complementario 2017. Lider di fraccion ...

Andin Bikker: “Ami no ta kere cu Alonso Tromp tin un caso”

Cuminsamento di siman Camara di Comercio a manda un carta pa Alonso Tromp caminda ...

‘Hopi biaha e minister anterior ta otorga cosnan cu no ta haya den ley’

Durante e conferencia di prensa pa anuncia cambio den maneho na DIMAS, Minister di ...

“Pakico mi no tawatin otro choice cu drenta politica atrobe”

Deseo pa keda votado so Mi a drenta politica caba na 2013 pero mi ...

‘Gobierno ta laga CAft sinta riba stoel di gobierno’

Porfin parlamento, dos siman mas laat cu ley di supervision financiero ta prescribi, a ...

‘Partido ABO si ta duna transparencia financiero y e bon ehempel’

Desde 2014, partido ABO ta bogando pa transparencia den politica. Transparencia den tur sentido. ...