Ayera nos a tende gritonan di Sr. Mike Eman pa instiga den e momentonan dificil aki cu nos pais ta pasando aden. Actonan aki ta sirbi solamente su propio interes y interes di AVP. Manera nos Prome Minister, Sra. Evelyn Wever-Croes a declara: “Awor ta momento pa Pais y no pa politica partidista”. Y e sentimento aki ta biba hasta cerca e propio votadonan di AVP. 

Union pa surpasa e crisis

Awor ta momento pa union y solidaridad y no pa division. Awor ta momento pa optimismo y no negativismo y discordia. Despues cu Mike Eman a nenga pa participa na cumbrenan nacional pa bin cu alternativa y of solucion e a sali solamente pa dividi un pueblo. Hamas e por a imagina cu Prome Minister por a logra negocia pa haya e finanzas necesario pa brinda alivio na esunnan afecta door di e crisis y na mes momento un clausula pa garantisa nos autonomia.

Interes propio y di partido

Mike Eman ta djis en busca di atencion. Pa lunanan caba Gobierno y Pueblo ta luchando contra Covid-19, na momento cu Aruba mester a cera su fronteranan pa controla e pandemia mundial y proteha salud y bida di nos conciudadanonan. Kico Mike Eman a haci e tempo ey? Critica crisis team y instiga pueblo.

Despues di lunanan di trabou y negociacion, tur sector di Aruba a compronde e situacion y a duna gobierno e confiansa den un di e momentonan mas dificil di nos historia. Kico Mike Eman ta haci awor? Critica Gobierno y instiga pueblo.

Situacion actual

Gobierno di Aruba despues di a negosha cu Hulanda intensamente a keda cla pa hunto nos por cuminsa e recuperacion di Aruba su economia y futuro.

Cu Apoyo di Hulanda y cu respet mutuo nos por fia e cientonan di miyones cu mester, pa na prome luga crea stabilidad pa siguridad di empleo, pa famia nan por tin pan riba mesa den e siguiente lunanan.

P’esey awor ta momento pa hunto den union y cu sentido di solidaridad y sacrificio pone e Master Plan di Aruba den accion pa nos cuminsa. Di e forma aki reeposiciona Aruba pa nos recupera nos Economia, pa famianan por sigui tin pan riba mesa. Pa gobierno por sigui yuda esunnan mas vulnerabel y sin empleo.

Pa conclui

Nos ta compronde cu Sr. Eman no tin bon experiencia cu finanzas, banconan y maneho di negoshi. Pero su memoria tambe ta fay’e barbaramente paso den su gritonan desespera nos no a tende nada di e deficitnan di riba 400 miyon florin ora e tawata na mando y cual a conduci cu e a haya un Koninklijk Besluit pa mal gobernacion.

Mike Eman a kibra nos finanzas, nos sector social, nos credibilidad financiero y nos credibilidad como pais. Dentro di poco e trayecto pa nos refineria ta keda cla y nos a compronde cu tin interes di companianan Mericano grandi. Si logra esaki Mike Eman lo sali bisa cu su deal cu Citgo tawata miho?

 

LEAVE A REPLY

Please enter your comment!
Please enter your name here