Gabinete Wever-Croes sigur ta demostra cu banda cu nan ta atende debidamente cu tur e retonan financiero di nos Pais, no ta perde di bista pa percura pa pone e ser humano central. Ultimo dianan aki nan a bin ta anunciando diferente noticia positivo poniendo e ser humano central. 

Gabinete Wever-Croes a anuncia e tremendo noticia cu coriente ta baha entrante 1 di januari 2020. E rebaho lo ta como lo siguiente: 10% pa casnan, 9% pa fundacion, misa y scol, y 7% pa comercio. Si un famia ta paga 250 florin pa luna, esaki ta 3000 florin pa aña. Bo lo spaar 10% di 3000 florin cu ta 300 florin pa aña. Esaki ta mas cu 1 luna di coriente. Sigur un alivio grandi pa hopi famia aki na Aruba. Pero otro instancia y comercio tambe ta bay gosa di un rebaho.

Otro anuncio cu sigur a trece alegria pa nos grandinan, ta cu conseho di Minister, riba proposicion di Minister di Turismo, Salud Publico y Turismo, a dicidi di aumenta e pensioen di behes (AOV). Esakinan lo aumenta na e siguiente forma entrante 1 di januari 2020:

– Pensioen pa soltero ta aumenta di 1.132 pa 1.157 florin

– Pensioen pa pareha ta aumenta di 1.906 pa 1.948 florin

– Pensioen dividi pa pareha ta aumenta di 953 pa 974 florin

E pensionnan pa huerfano y viudo ta keda adapta cu e mes un porcentahe.

Otro bon noticia cu a keda anuncia recientemente ta cu minister Dangui Oduber a firma pa e proceso cuminsa pa entrante 2020 tur e productonan di cannabis medicinal ta accesibel pa comunidad.

E proceso pa legalisa cannabis medicinal ta canando for di hopi tempo. Conforme e acuerdo di gobernacion di partidonan MEP-POR-RED lo legalisa e uzo di cannabis medicinal. Minister presidente sra. Wever-Croes a institui un comision pa explora e posibilidadnan y for di algun tempo caba minister Dangui Oduber ta trahando riba esaki.

Despues di un periodo di haci tur e preparacionnan necesario e momento a yega cu por cuminsa e proceso oficial pa e legalisacion di e uzo di cannabis medicinal. Minister Dangui Oduber a firma pa e proceso cuminsa pa realisa dicho legalisacion y haci posibel cu entrante 2020 tur e productonan cannabis medicinal ta accesibel pa comunidad. Sigur esaki ta otro logro di Gabinete Wever-Croes considerando e hecho cu nunca antes a haci esaki. Un gran cantidad di persona ta haci uzo di cannabis medicinal pa nan salud y ta importante cu awor ta legalisa esaki. Minister Oduber a haci peticion na departamento huridico pa traha riba e decreto ministerial pa di e forma aki e importacion di e productonan di cannabis medicinal wordo legalisa. Gabinete Wever-Croes ta enfatisa cu ta trata solamente legalisacion di uzo medicinal y no cannabis recreacional.

Parlamentario Tromp-Lee ta termina bisando cu Gabinete Wever-Croes a priminti y awor ta cumpli cu diferente punto di deseo di pueblo.

 

LEAVE A REPLY

Please enter your comment!
Please enter your name here