Parlamentario ta exigi reorganisacion Dimas a bira di mas?

editorial.jpg

Ata nos cu otro novedad den gobernacion. Nos no a caba di celebra esun di e ministro cu no ta logra gasta tur su placa, ata un parlamentario cu ta apoya gobierno ta exigi reorganisacion di un departamento cu no ta funciona debidamente. E prome asombro naturalmente ta cu ta trata di un  ‘backbencher’ cu supuestamente ta papia solamente ora nan haya orden pa papia, y e discurso riba papel acerca, por si acaso den nan entusiasmo nan bay bisa cos for di sla den prensa. E pregunta ta si den e caso esey tambe ta aplicabel. Tambe a primera bista por a pensa cu e politico aki porfin ta kibra silencio den su partido y a cuminsa critica e servicio hopi deficiente di varios departamento gubernamental. 
Pero grandi ta e decepcion ora cu ripara cu e parlamentario no ta fulmina na fabor di comunidad cu ta harta di mal servicio den gobernacion, pero ta haci esey pa defende interes di esnan cu a bay  cerca e ministro concerni, cu por ehemplo a cambia un decision tuma pa e departamento aki y cu tres palabra y un firma ta debolbe e asunto  na e departamento pa ehecuta e decision cu el a tuma. Pa bon comprension di e asunto: aki ta trata di persona, local o stranhero cu ta logra haya cita cerca e ministro. Den hopi caso ta mas facil pa un stranhero haya cita cu e Arubiano mes. Asina tin caso cu e dunado di trabao no a logra haya cita, pero su empleado cu mester permiso si a logra. Nos nunca por a haya un bista den e sistema di atende hende, pero ta parce cu e adres particular di e ministro ta mes importante cu su oficina oficial.
Esnan cu logra penetra te na e ministro pa e atende e asunto personalmente, ta logra of no di haya su decision cu ta deshaci di e decision, bon of malo, tuma anteriormente pa e departamento concerni. Awor, den e caso cu e ministro no ta di acuerdo cu e decision tuma pa e departamento, lo ta logico cu e ta tene cuenta cu pa esaki tin un proceso oficial di apelacion contra e decision. E proceso aki sigur no ta uno cu ta gana premio di beyesa, pero e ta e caminda indica cu tur ciudadano mester sigui. Si e ministro ta habri e posibilidad, na cas of na oficina, cu ciudadano por tuma ‘short cut’ yegando na un audiencia personal, e pregunta na su persona ta anto si ta recomenda tur hende pa tuma e short cut aki…
Aunke nos tin nos critica riba e funcionamento di e proceso di apelacion via LAR, no ta parce nos corecto cu, tanten e ley ta existi, pa bay recomenda hende pone esey un banda y purba traha cita cerca e ministro mes. Lo tin varios caso di hende cu por recomenda esaki pasobra nan tabatin exito, pero no ta esaki ta e cosnan cu ta hiba nos na e cualificacion di ‘republica di banana’?
Ora nos a kere cu e apreciando parlamentario lo a bin cu critica y proposicion pa mehora e servicio pa e ciudadano, e ta solamente atendiendo e interes di esnan cu a logra yega cerca e ministro y a haya un cambio  di decision via e famoso ‘krabbel’ y cu seguidamente a topa cu cierto falta di boluntad di banda di e departamento pa ehecuta e decision di e ministro. Den e caso aki e empleadonan publico aki mester simplemente actua ‘by  the book’. Si e ministro su decision no tin un base legal drechi, mester informa su persona di esey. Si e ta insisti cu ta ehecuta e decision, anto ta pidi un confirmacion por escrito. Si tin e orden por escrito, anto ehecuta esey, cu tur responsabilidad pa e ministro. E problema ta cu tin asina un situacion di intimidacion den e departamento, cu lo no tin hopi funcionario cu ta dispuesto di haci esaki. Anto bo ta haya un ambiente di rechaso y oposicion silencioso, cu no ta yuda mehora trabao di e departamento.
Tambe e parlamentario ta toca e tema di falta di respet pa e persona nombra como subdirector cu facultad special cu ningun director interino den gobierno tin. Pero kico ta spera ora ta nombra un bode riba cabes di tur hende anto kere cu esey no tin repercusion den e departamento? Den esaki no ta e ministro concerni ta carga falta, pero henter conseho di ministro cu a bay di acuerdo. Ta ki mensahe ta duna aki na e hobennan cu ta studiando ainda? Pa nan stop di crea debe pa nan mes y traha riba nan carera cuminsando na bode? Ta berdad cu den un hotel hopi tempo pasa bo por a subi di bellboy te general manager, pero awendia esey no ta posibel mas. Den gobernacion nunca e tabata asina, pero na 2016 diripiente si por. Ta bira tempo pa en berdad pasa e departamento aki pa ministerio di Husticia, unda e ta pertenece na prome luga. Esey no ta garantia di exito, pero miho cu e caos actual.

 

You May Also Like

Uitzendbureau a bin pa keda?

Con pa limita su efecto negativo… Nos a tuma nota di e deseo di ...

‘Pleito’ di Nicolas Maduro pa desvia atencion?

Y kico Hulanda ta haci? E noticia di siman tabata naturalmente e anuncio sorpresivo ...

Protocol cu Hulanda ta entre pareu? O entre supervisor y  supervisado…

Si nos sigui e ultimo acontecimento y comentarionan encuanto e continuacion di e supervision ...

Caso IBIS mester ta un les pa henter comunidad

E caso hudicial mas grandi di nos historia a clausura su prome siman, cu ...

Sistema bancario mester upgrade

Banconan comercial y CBA ta protagonista Aruba ta purba realisa un economia innova cu ...

Perspectiva insigur ta persisti na 2017

  Aña 2016 a termina cu economia di Aruba den un slump. Segun Banco ...