A3 23jul, NP, FADA (1).jpg

Den media a sali recientemente informacion cu un persona den un club na Noord lo a wordo droga cu “Devils Breath” rosea di Diablo. Segun FADA, nan instancia no por confirma esaki, como cu nan no ta registra e casonan aki. Tambe nan a indica cu e no ta un droga nobo y a yega di conscientisa tocante esaki.

Segun Fundacion Anti Droga Aruba (FADA), e droga no ta algo nobo y tabatin informacion riba e tipo di droga aki caba. E detaye ta cu e droga ta bin for di un flor, cu no ta crece na Aruba. Otro nomber di e droga aki ta Scopolamina, y ta un droga cu ta bin den forma di un puiro cu ta den e flor, cual puiro ta wordo supla den hende su cara. E mata ta yama Borrachero anto e ta wordo cultiva na Colombia Venezuela y Ecuador. E ingrediente principal den e mata aki ta Scopolamina of e ta wordo yama Burundanga y ta sin color of sabor. Manera menciona caba, e puiro den e flor ta wordo supla hopi biaha den cara di un persona, of e ta wordo poni den bebida y e efectonan di e droga ta activa den algun minuut y tin duracion di oranan largo.

Efectonan
Efectonan di e droga ta entre otro, perdida di conocemento completo, e victima ta bira mentalmente controlabel door di e malhechornan, e memoria di e victima ta wordo blokia door di e droga. Algun proposito di malhechornan pa droga un persona cu substancia aki ta pa comete un acto di abuso sexual, of horta placa den cuenta bancario di un persona, donacion di organo tambe ta entre e casonan registra. E actonan aki ta sosode cu permiso di e victima ora cu e ta bou influencia di e droga. Tur ta actonan cu e persona ta bay di acuerdo pa haci, contra di su moral si e no tabata bou di e influencia di e droga. E droga ta wordo mira hasta como un di e droganan di mas espantoso na mundo como cu e ta facil pa wordo uza riba un persona sin cu e sa. Un manera hopi comun ta, un malhechor por cana riba caya, supla esaki den aire riba un persona sin cu e realisa, sigui e persona pa algun minuut mientras cu e droga ta tuma efecto, pa despues e tin e persona completamente den su gara unda cu bo por bay cun’e y guia e persona unda cu bo ta desea manera un mucha chikito, como cu despues di e efecto e lo no corda nada mas.

Si na e momentonan aki e droga ta circulando na Aruba, FADA no ta na altura di esaki, pero ta puntra rond kico ta pasando como cu a haya informacion di un situacion cu a pasa cu un persona. Pero banda di esaki no a mira ni tende nada mas. 

Falta informacion caso recien
E noticia a wordo treci dilanti den un medio di comunicacion den forma di un alerta na otronan pa ta cauteloso. Sinembargo no tin mas informacion di e persona, por ehempel si el a bay haci un test di droga pa haya sa kico por a tuma luga. Tampoco tin informacion di e luga indica den e articulo como un club nocturno na Noord, unda cu e persona ta sospecha cu e lo a wordo supla den su cara cu e puiro aki. Tin informacion cu e droga ta wordo uza como medicina segun cierto dosis, pero por hasta causa morto di personanan si abusa di esaki. Riba Facebook e caso aki a haya masha hopi reaccion di e comunidad cual definitivamente ta yuda pa hendenan ta mas alerta. A pesar cu no por bisa cu siguransa cu ta Devils Breath a wordo uza. Den e caso recien aki, e señora ta splica cu pasando memey di hende bayendo baño ta ora cu el a sinti e puiro bin riba su cara, despues cu el a sali for di baño el a bay na su auto y a haci su wowo limpi cual a keda poco afecta locual cu a scapa cu algo malo kisas no a pasa cun’e ta cu e tabata cu su casa, kende a bay cas cun’e y a bay off mentalmente. 

FADA mes ta enfatisa cu nan si conoce e droga caba, pero no sa si e ta wordo uza na Aruba. FADA mes, no ta registra e uzamento di droga, esaki ta informacion cu ta den man di esunnan cu ta traha curativo, pues ora un hende bay busca ayudo. Por ehempel esunnan cu ta uza un droga riba caya, no tin cifra di dje y pues ta dificil pa papia di circulacion. Si un persona no bay busca ayudo na un instancia pa haci test of check su sistema, no por bisa specificamente kico por a tuma luga. Fundacion pa Maneho di Adictonan Ambulante ta un instancia cu ta atende cu e parti curativo.

Conscientisacion
FADA mes lo publica algun informacion di conscientisacion pa e tipo di droga aki, mirando cu ta papia di dje atrobe den comunidad, pa e sirbi como un recordatorio of pa refresca memoria di e peligernan y con pa evita cualkier situacion.

 

LEAVE A REPLY

Please enter your comment!
Please enter your name here