Presidente di Venezuela Nicolas Maduro a keda autorisa pa habri un huicio riba mayoria di parlamentario opositor den parlamento, den cual ta inclui e posibilidad di habri huicio pa delito militar y di delito di terorismo, despues cu un decision hudicial a laga tur parlamentario di Venezuela sin inmunidad.

E ta un sentencia historico” Maduro a bisa. El a splica cu decision di tribunal supremo di husticia ta duna un poder special pa defende e proceso di institucionalidad, paz y asina Maduro por rechasa cualkier agresion cu por bin contra Venezuela.

Tribunal Supremo ta considera como un agresion contra Venezuela e solicitud di secretario general di OEA, Luis Almagro dilanti di Conseho permanente di e organismo aki, caminda ta busca pa sanciona Venezuela, si e no ta planifica un proceso di eleccion lihe, cu segun Almagro ta kibra cu sistema constitucional y ta deteriora e nivel socio-economico di e poblacion na Venezuela. Maduro a referi na e iniciativa di banda di mayoria opositor den asamblea nacional, cu a yega na un acuerdo dia 21 di maart cu ta apoya e solicitud di Almagro. Husticia lo yega na oposicion”” Tareck El Aissami a adverti.

E motibo principal cu a origina e decision di banda di Tribunal Supremo di Venezuela tabata e acuerdo parlamentario, cu a solicita organisacion di estado Americano pa convoca un conseho permanente y asina evalua e posibilidad di aplica e carta democratico inter-Americano riba Venezuela, pa despues duna esaki algun sancion. 

OEA a reuni diamars na Washington pa cumpli cu e solicitud di 18 pais, entre nan tin Argentina, Brasil, Colombia, Estados Unidos y Mexico, cu obhetivo di discuti e situacion di Venezuela. Dene reunion ey mayoria di pais cu a participa a mustra nan preocupacion pa e crisis y a dicidi pa yama un conseho nobo cu un mecanismo diplomatico formal cu por yuda haya algun solucion pa e situacion di Venezuela.

Sin inmunidad
TSJ a dicta un sentencia caminda parlamentario no tin proteccion mas, pasobra nan ta den desorden y no ta cumpli cu norma estableci den parlamento. “Inmunidad parlamentario ta ampara … acto di diputado den su ehercicio di atribucion constitucional. Awor diputado no ta trahando den su ehercicio di atribucion constitucional, anto e situacion actual ta di desacato” e sentencia a splica. 

Na cuminsamento di aña 2016 Tribunal Supremo di Venezuela a declara organo di Asamblea Nacional di Venezuela den desacato, pasobra nan ta considera cu e asamblea no a saca tres diputado, cu ta acusa di fraude electoral. Como consecuencia anto Tribunal Supremo a anula tur decision cu a sali for di sede di parlamento legislativo na Venezuela.

 E bloke di oposicion a rechasa e decision ey, pasobra nan ta pensa cu ta viola autonomia parlamentario, nan a denuncia cu TSJ ta busca kita e proteccion di parlamentario den asamblea nacional y asina duna mas y mas poder na Nicolas Maduro. Den e sentencia, e tribunal supremo ta critica tur accion di Almagro y nan a solicita tambe pa presidente Maduro pa tuma “accion y evita un estado di conmocion”. Tribunal Superior di Venezuela a duna na Maduro un poder pa tuma medidanan contra diputado. E medida mas grave ta e posibilidad di habri un huicio militar contra diputado”, Pedro Afonso Del Pino, abogado constitucionalista, a splica.