Parlamento lo por haya reforma fiscal y presupuesto 2020 pareu; BBO no lo aumenta y no lo conoce componente adicional den reforma fiscal

Te ainda ta existi un expectativa grandi riba e componentenan di e reforma fiscal. Te aworaki gobierno a divulga algun componente di dje, esunnan mas faborabel.

Pero te ainda e parti cu lo por resulta impopular no ta conoci. Nan ta cambionan riba impuestonan pa gobierno por atende cu e presupuesto di pais Aruba pa 2020.

Presupuesto.
Contestando pregunta di Bon Dia Aruba, minister di Finanzas y Asunto Economico, Xiomara Ruiz-Maduro, a declara cu e reforma fiscal ta canando su proceso legal. Ainda e ta na Raad van Advies (RvA) pa duna su conseho. Igualmente e instancia aki ta bezig cu e presupuesto 2020 y -segun informacion cu e matutino aki a compila- eventualmente e presupuesto lo wordo trata entrante otro luna.

Di su banda e mandatario a bisa cu e dos leynan menciona ta bay cana hunto, y probablemente tur dos, tanto e cambionan riba e ley di e reforma fiscal y presupuesto 2020, lo yega hunto na Parlamento. “Pasobra tur dos tin di haci cu otro,” el a bisa.

E presupuesto aki ta bay conoce cambio riba e manera cu e ta hinca den otro. E cambionan aki ta encera cu parlamento di Aruba ta bay haya un miho bista pa medio di grafico y splicacion, pa asina facilita su interpretacion. Asina nos organo legislativo por haya un miho bista di nos sistema y situacion financiero di pais Aruba. El a sigura cu e forma aki ta bay duna mas realce na e informacion accesibel na Parlamento.

Pa trece un tiki di trankilidad na e expectativa cu ta existi riba e componentenan di e reforma fiscal, Ruiz-Maduro a delanta cu ‘no lo tin cambionan drastico’. A lo menos no cambio cu lo por sorpresa bo y cu bo lo bisa como ciudadano: ‘E gobierno aki a bin cu algo completamente diferente’. E mandatario a descarta un sorpresa di e magnitud aki den e reforma fiscal, sigur no den e fase dos di e reforma aki.

Futuro di BBO.
Den e fase dos (2) di e reforma fiscal cu gobierno a yega di presenta aña pasa, tabata premira kico lo bira e futuro di BBO. Den e segundo fase di e cambio di reforma fiscal, gobierno ta indica cu esaki no ta bay afecta BBO, ya cu e decision ey no a wordo tuma. “Nos no ta cla ainda como pais pa e decision ey”, el a bisa.

Kiermen cu e BBO ta keda den e situacion cu e ta actualmente. Pues e mandatario a confirma no lo tin cambio di tarifa y tampoco den su componentenan. Pa medio di e noticia aki e mandatario tambe a purba di trece mas trankilidad, ya cu e asunto di BBO su futuro y cambionan, tabata uno basta anticipa y cu a genera hopi inkietud, specialmente cerca gremio comercial.

Cu un ‘no’ rotundo, Ruiz-Maduro a bisa cu como gobierno responsabel, nan ta indica adelanta cu e BBO ta forma parti di e fase dos di e reforma fiscal. Pero nan no a alcansa pa bin cu cambio riba dje. Cu esaki e kiermen cu e parti di cambio riba BBO ta kita for di e fase aki di e reforma fiscal. “Hopi hende tabatin pregunta cu si esey ta bini, anto nos no ta prepara p’e,” el a declara.

Reforma fiscal.
E reforma fiscal manera gobierno a concipia esaki, esaki ta consisti di cuater fase. Aworaki nan ta trahando riba implementacion di e segundo fase, y nan lo conoce algun cambio, manera el a indica caba. Pero den e cambio riba e reforma fiscal, gobierno ta sigui traha riba e di tres y cuater fase.

E mandatario a reconoce cu berdad como gobierno nan a cuminsa duna di conoce e parti beneficioso di e reforma fiscal net prome cu fin di aña. E tabata un forma pa asina nos tur, tanto gremio como comunidad den general, por tin un aliento. Pero un meta tras di dje tambe ta -segun e minister en cuestion- pa purba cambia e pensamento cu reforma fiscal ta algo malo. “No! Reforma fiscal ta algo bon pa e pais aki,” el a indica.

Ruiz-Maduro a reitera cu pa medio di e reforma fiscal nos ta bayendo den un sistema ‘mas simpel y mas husto’ pa nos pais. Sinembargo e cambionan fiscal of implementacion di impuesto, semper ta trece cune cu un grupo ta keda contento y otro menos contento.

Pero den e caso aki e kier bisa cu for di un bista mas amplio, e reforma fiscal ta pa yuda cada un di e grupo ey. “Nos ta buscando e balans cu Aruba tin mester como pais,” el a agrega. Segun e mandatario, nos sistema fiscal tin componentenan cu ta hopi anticua; y mester di adaptacion y cambio.

Na final di su declaracion, Ruiz-Maduro a compromete su mes di bin cu mas informacion unabes cu e tin e conseho di e organo di consultoria (RvA) riba e parti di e siguiente fasenan di e reforma fiscal. Pero tambe e lo bin dilanti pa duna un splicacion pa locual ta presupuesto di pais Aruba, cu ta bay conoce cambio, manera el a anuncia ariba. El a pidi comunidad pa keda un rato pendiente, ya cu gobierno lo bini cu informacion completo pa tur hende lo por ta debidamente informa.