Apenas ta falta cuater dia pa decision crucial cay den reunion di conseho di minister di Reino den direccion di Aruba pa loke ta trata e controversial landspakket y entidad di Caribiesche. Na ta parti di e condicionnan  cu Hulanda a bin cune pa facilita  su ayudo financiero pa nos pais meymey di e crisis cu e pandemia a trece cune.

 

Te ainda no tin mucho claridad riba e resultado final di e pakete di condicionnan y reforma cu ta wordo negosha cu Hulanda. Ultimo dia despues cu e crisis interno di partido POR tabatin su consecuencia pa gabinete Wever-Croes mes.

 

Recientemente Prome Minister Evelyn Wever-Croes a admiti cu e fecha di e reunion di Conseho di Minister di Reino ta acercando, y cu ta bira urgente pa tuma decision como Conseho di Ministro di Aruba pa loke ta bay presenta na Hulanda, pero gobierno ta “tranca.”

 

Esaki ta evidente, mientras cu e situacion interno di partido POR cu minister Lopez-Tromp no a wordo resolvi, te ainda e mandatario aki ta na Hulanda. Eventualmente e lo ta na Aruba prome cu diabierna awor.

 

Igualmente nos principal organo democratico parlamento ta den receso. Tambe nan ta na spera di informacion di parti di gobierno riba e ultimo desaroyo di e negociacion cu Hulanda. Ayera y awe parlamento ta na spera di haya algun update di gobierno. Tambe ta wordo spera cu gobierno lo haci mesun cos cu gremio di dunado di trabao y sindicalistanan.

 

Parlamentario Endy Croes a declara na Bon Dia Aruba cu a pesar cu nan ta den receso, tin diferente actividad cu ta tuma luga tur siman. “Ta hopi importante pa sa e negociacionnan ultimo dos siman, unda nos ta para awe,” el a declara.

 

El a bisa cu aki un rato nan fraccion ta bay palabra cu presidente di parlamento pa bin cu un reunion “extensivo” riba e topico di e negociacion cu Hulanda e siman aki ainda. E ta kere cu den conhunto nan lo por tuma e miho decision pa henter nos pais.

 

Como parlamentario nan a compronde di gobierno cu te luna aki tin placa y esaki ta pone nos pais den un situacion dificil pa atende cu su compromisonan otro luna. Den esaki e ta kere cu mester bin un balans den e decisionnan cu mester wordo tuma.

 

Aunke e ta condena e actitud di Hulanda di uza e crisis cu e pandemia mundial a causa pa bin cu e tipo di condicionnan aki.

 

El a referi cu parlamento Europeo a aproba 750 biyon Euro di cual un gran porcentahe ta bay pa subsidia y otro pa prestamo pa interes minimo pa post Covid. Na momento aki cu Hulanda tambe tin acceso na e placa ey, nan ta poniendo hopi presion cu e ayudo financiero pa Aruba. Pa asina nos gobierno di Aruba firma entregando gran parti di nos autonomia, el a bisa.

LEAVE A REPLY

Please enter your comment!
Please enter your name here