Ayera tabata e prome diadomingo cu e campananan di diferente misa a cuminsa bel di nobo pa anuncia e celebracion di e Santa Eucaristia. Esaki no a sucede desde cu gobierno a decreta e medida di shelter in place.
Celebracion di Santa Misa a cay den e fase 2 di flexibilidad cu a cuminsa dialuna ultimo. E mesun dia, vicario apostolico y representante di e diocesis di Willemstad, Andres Makowiec a yega di anuncia cu nan ta habri e portanan di misa den algun parokia rond di Aruba cu ta cla pa implementa e reglanan di higiena di DVG.
Tambe Obispado a bin cu su propio reglanan pa medio di un decreto episcopal cu ta evita e dunamento di man como señal di paz, Santa Hostia ta wordo duna na man, no tin uzo di awa bendita, etc… Ayera algun parokianonan a expresa nan alegria di por a participa di celebracion di Santa Misa di un forma fisico y no virtual. Pero specialmente cu nan por a ricibi Santa Hostia riba diadomingo.
Localmente autoridad di salubridad publico hunto cu crisis team a logra e strategia di ‘crash the curve,’ y minimalisa te 3 caso activo e cantidad total di 101 caso positivo di contagio di e virus na Aruba.
Aunke algun medida manera shelter in place no ta vigente mas, si e reglanan di higiena basico y di prevencion manera distanciamento social y laba man frecuentemente, ta sigui vigente, te cu nobo aviso.
