Hunga Teca ta ofrece muchanan entre 0 te cu 12 aña e oportunidad pa desaroya nan creatividad social y mental door di diferente wega y cos di hunga den un ambiente safe bao guia di expertonan profesional.
E intencion di e fundacion ta pa presta cos di hunga na muchanan cu door di un of otro motibo no tin e posibilidad pa cumpra esaki. Manera ta conoci door di hunga muchanan ta desaroya y siña hopi mas lihe y miho. E fundacion a logra haya cos di hunga door di hopi donacion haci. Tur ta weganan segunda mano pero den bon condicion. Tur cos di hunga ta wordo haci limpi cada biaha cu nan wordo treci bek.
E miembresia ta Fls. 5,00 pa aña y por presta e cos di hunga pa 3 siman largo. Despues ta trece esaki bek y por bay cu otro. Hunga Teca ta mescos cu un biblioteca pero den e caso aki di cos di hunga.
En conexion cu dia Internacional di Mucha Hunga Teca ta organisa un actividad dushi pa e muchanan cual ta ‘Nos Tur tin Talento’. Pa esaki e mucha lo haya un tas di canvas pa pinta riba dje y expresa su talento den forma di arte. Esaki ta tuma luga Diasabra 20 di November di 9-11 di mainta. Participacion ta completamente gratis pero mester registra na tempo.
Hunga Teca ta situa na edificio di YMCA na Pastoor Hendrikstraat 55 na San Nicolas. Nan ta habri tur diasabra di 9-11 di mainta. Tur mucha ta keda cordialmente invita pa hunto cu nan mayor, welo of wela bin pasa un rato dushi, hungando weganan educativo. Entrada ta completamente gratis.
Pa mas informacion bishita nan Facebook page Hunga Teca y keda bon informa.
