Partido AVP: ‘Pa persecucion politico Aruba ta keda sin Oncologo pa 10 dia’

ORANJESTAD – Loke a caracteriza e Gobierno actual di Aruba, e líder di AVP Mike Eman a bisa den Cas di Cultura diaranson anochi, ta persecucion politico of persecucion pa motibo di pensamento. Esaki ta un di e motibonan cu a pone partido AVP lanta para pa pueblo y organisa un Manifestacion Nacional pidiendo pa eleccion nobo.

Den Cas di Cultura a yama un reunion cu simpatisantenan pa nan compronde pakico un Manifestacion Nacional, pa diabierna, 12 di april, t’asina importante.

Un di e personanan cu a subi escenario di Cas di Cultura pa dirigi su mes na e publico ta Ruth Lejuez Lacle, un pashent di Cancer. El a papia di e situacion cu dr. Jonkhoff a pasa aden aki na Aruba. E isla aki, el a splica, ta conta cu solamente un specialista di cancer, esta dr. Jonkhoff. Dado momento esaki a bira imposibel y a papia cu Gobierno pa un ayudante, y asina “e guera y persecucion a cuminsa cun’e. Nan a keda haci fastioso cun’e cu el a fada y a dicidi di pidi su retiro pasobra no tabata responsabel mas pa e keda. Nan a bira contento y hasta baila mi ta kere.”

E situacion actual ta cu diamars awor dr. Jonkhoff ta subi avion y bandona Aruba, diaranson su ayudante (reemplasante) ta bay. “Si boso tin un familiar cu ta sperando un resultado, reza pidi Dios pasobra e lo no haya. Lo no tin un Oncologo na Aruba despues di diaranson pa dunabo un resultado of tratamento. Kende nos mester culpa? E Magazijnmeester cu nos tin ta guia Salubridad Publico cu ta bruha schroef cu clabo. Nos mester tin cu manda nan cas mayan, ta basta, nos no kier mira nan mas. Ta suficiente! Nos tin un Oncologo aki, pakico lague bay? Nos ta bay keda 10 dia sin un Oncologo. E ta dispuesto pa keda, pero ta bayendo cu sentimentonan mixto pasobra su pashentnan ta keda desampara. P’esey manda nan cas, ban eleccion, ta basta,” e pashent di cancer a expresa.

Dr. Jonkhoff mes tambe tabata presente y a splica cu e tin 20 aña den e profesion. El a conta di e 3 simannan di mas horibel di su carera. El a conta e storia di un hoben di 28 aña, cu no por bay ningun caminda, pasobra no tin un dokter pa atende, pa duna e instruccionnan, pa mande afo. “E mucha muhe aki probablemente no ta yega ni 30. E Minister aki tabatin un aña y mey pa interveni. Mi tabatin critica y mi a expresa esaki. P’esey mi mester disparce. Pa protege mi mes, mi a dicidi entrega mi retiro. Pero mi a hala e retiro bek aden mesora. E anulacion di mi retiro ta sinta 6 luna den lachi y nan no kier acepta. Cu Mike Eman esaki lo no a sosode.”

Dr. Jonkhoff ta wordo considera un specialista cu ta lucha pa su pashentnan y e situacion actual, sin su persona, lo ta horibel y ta duel’e esaki masha hopi pa su pashentnan.

 

You May Also Like

Mike Eman invita pa duna lectura na Hulanda

Specialmente pa su vision y añanan di dedicacion na duna un contenido nobo na ...

Parlamentario Sue-Ann Ras (MEP): ‘Weekendschool ta un proyecto cu sigur por haya luga na Aruba’

ORANJESTAD – Diadomingo ultimo, Parlamentario Sue-Ann Ras a pasa un dia completo na IMC ...

Parlamentario cu a pasa otro un wanta ta bek den parlamento

E partido MFK a anuncia cu lo duna parlamentario Jacinta Constancia su asiento den parlamento ...

Parlamentario Marlon Sneek(AVP): ‘Inflacion riba cuminda a aumenta cu 4.1% y fruta 18.1%’

ORANJESTAD – Aruba tin un partido politico cu a cambia nomber den ultimo simannan ...