E refineria ta birando un ‘never ending story’…

E calvario di e refineria ta parce di no conoce fin. Mientras cu ya caba e ultimo noticianan di Prome Minister no tabata laga espacio pa tanto speransa cu e lo mira reapertura, e ultimo comunicado di prensa di ayera a caba di corona obra.

Den e negociacionnan cu e hendenan di Guaido na Merca, ta bin sali cu lo tabatin un caso di malversacion di gran parti di e placa cu tabata destina pa inverti na Aruba. Di un total di $260 miyon solamente lo a usa alrededor di $ 80 miyon; e resto lo a cria pia… Un noticia bastante sorprendente, si e ta berdad o no. E comunicado no ta duna tanto detaye pa por averigua kico lo por a pasa. Por ehemplo, no ta conoci si e suma total lo a yega Aruba y lo a desaparece for di cuenta di un di e companianan na Aruba, o cu e malversacion a tuma lugar entre cuentanan bancario di diferente compania di e consorcio di Citgo na Merca mes.

E comunicado di prome minister tampoco ta yuda pa duna claridad ya cu ta haci mencion di e empresa Pdvsa, cu cual lo a hiba deliberacion, mientras esey no ta posible. Pakico no? Pa e simple motibo cu Pdvsa ta e empresa estatal na Venezuela, cu ta propietario di henter e aglomeracion di compania na Merca alrededor di e empresa Citgo Petroleum Corporation. Loke e hendenan di Guaido ta maneha na Merca ta desde PDV Holding bay abao, siendo esaki e holding mas halto den e herarkia y propiedad directo di Pdvsa. Mientras Pdvsa ta keto bay den man di e regimen Chavista, tur e empresanan na Merca ta actualmente bao control di e presidente interino Juan Guaido. Nos a spera mas exactitud di un comunicado oficial di gobierno di Aruba, cu ta causa confusion den e parti aki. Como cu nos redaccion ta bon na altura di e situacion dentro di e consorcio, nos ta supone cu a delibera cu representacion di PDV Holding Inc. como e ‘empresa madre’ de facto na e momento aki pa e demas companianan na Merca.

Esaki tambe ta e base pa e licencia cu e consorcio a haya pa por transferi placa entre nan, cu e condicion cu nada mag yega na cuentanan di Pdvsa, ni den exterior, ni na Merca mes. Cu esey por bisa cu e consorcio por manda placa pa Aruba pa inverti, si nan mes ta desea esey. Awor ta bin resulta cu nan no tin gana pa haci esaki, y awor a surgi sorpresivamente un motibo extra pa no haci esey: e placa cu lo a desaparece. Na nos parecer, si acaso henter e situacion di e hortamento di placa no a surgi, di mes caba e consorcio bao di e dirigencia nobo no tabatin mucho gana pa continua cu e proyecto na Aruba. Y si bo no tin intencion di haci esey, cada dollar cu bo manda Aruba den bo vision ta placa benta afo. Ademas, manera bisa anteriormente den e editorial aki, e contrato firma na 2016 nunca a bay Asamblea Nacional pa ratificacion. Claro cu Nicolas Maduro no ta duna ningun valor o reconocimento na e asamblea cu Guaido ta dirigi, pero den asuntonan legal internacional esey si ta importante. Por ta cu na e momento aki Guaido y su hendenan no kier hunga e wega asina fuerte, pa no daña futuro relacion cu un bisiña cu por resulta importante pa nan a largo plazo, pero ta di comprende cu na e momento aki e refineria obsoleto na Aruba no tin ningun prioridad pa nan. Loke si por tin prioridad pa nan, y inmediatamente despues di yega na poder na Venezuela, ta e facilidadnan di transshipment cu Aruba tin. Manera ta conoci, e facilidadnan di deposito na e diferente islanan Hulandes ta importante pa Pdvsa, den futuro tambe. Esey por ta un motibo pa Guaido y su hendenan no ‘play hardball’ awor distanciando nan mes di e contrato cera cu gobierno Chavista cu no a cana e caminda legal corecto.

Cu tur esaki, awor nos ta den un situacion cu na Aruba nos mester sa kico nos ta bay haci. Aki tin algun asunto importante pa regla. Nos ta ripara cu tin bastante preocupacion bao di e poblacion pa e yegada di combustible cu Aruba mes ta consumi. No ta nada straño pa ainda topa cu hende cu no sa cu Aruba tin trinta y pico aña sin produci ni gasolin, ni diesel. Tur cos, desde prome cu Lago a cera, ta bin di exterior. No ta asina dificil pa RdA NV y su subsidiario FMSA NV tuma e responsabilidad aki di Citgo na momento cu nan no por garantisa esaki mas. Banda di esaki, gobierno lo mester dicidi si ta bay yega na e conclusion cu PDV Holding no ta cumpliendo cu e contrato y cu ta kibra esaki, poniendo nan responsable pa e stipulacionnan di e contrato, manera e pago di e 350 miyon dollar di compensacion na Aruba.

Mientras tanto, nos lo warda trankilamente kico ta resulta di e investigacion cu ta haciendo encuanto e placa cu a somenta. Esey por bira un storia mas largo ainda…

 

You May Also Like

Tin alternativa pa aumento di salario minimo?

Dialogo (publico) a cuminsa Despues di e prome shock di e anuncio di kier ...

Ley di telecomunicacion ta ‘outdated’

Ademas no ta atende mundo digital  A surgi algun conmocion tocante e carta cu ...

Wakiendo? Pakico No Wakando?

E titulo di e editorial aki por mustra straño, pero ta refleha e situacion ...

Gobierno no por carga monumentonan su so

Den e reciente celebracionnan enfasis tabata principalmente riba e celebracion mes y e reconocimento di ...

editorial 2_15_1.jpg

Gobierno ta insisti den crea confusion..Cu cua Citgo nan a cera deal?

Keto bay gobierno ta keda referi na ‘Citgo’ como nan partner pa reapertura di ...

Con serio e menasa di maduro ta?

Y cuanto nos tin di perde? Presidente Nicolas Maduro di e pais bisiña a ...