Bogota – E liberalnan y ‘la U’, manera e partido Social di Unidad Nacional ta conoci, a cuminsa haci esfuerso pa cambia rumbo di eleccion presidencial 2018.
E strategia nobo ta consisti di presenta un lista unifica di candidato pa Senado den eleccion di maart 2018, loke lo laga nan tambe den e mesun union pa e contienda presidencial cu ta sigui.
E reto nobo di e partidonan aki, cu di tur manera ta depende di e reforma politica pa inclui un articulo den e sentido aki, lo ta pa apodera di e mayoria di Senado, cu e tesis di e defensa di e proceso di paz (cu guerilla), y apoya e candidato ganador di e consulta den partido Liberal.
Esey tabata e proposito tambe di e presencia sorpresivo di e senadornan Roy Barreras y Armando Benedetti (di ‘la U’) den e Congreso Liberal diabierna pasa, unda nan a interveni pa propone abiertamente e aliansa ey.
Nos idea ta pa bay unifica cu liberalismo den un solo lista di candidato pa Senado cu por garantisa nos por lo menos 40 asiento.
“Mi ta imagina un lista pa Congreso unda tur cu tabata di acuerdo cu e ‘Sí’ ta reuni: liberalnan, partido di ‘la U’, y si por tin otro partido mas cu tabata cu e ‘Sí’ den e plebiscito (di e acuerdo di paz), miho ainda”, Benedetti a bisa.
“Si nos gana eleccion di maart pa Senado cu mas di 40 asiento, esey practicamente lo defini resultado di eleccion presidencial,” Barreras a afirma.
Aunke cu e Congreso Liberal a aproba ken lo ta hefe di e partido, César Gaviria y e candidato ganador di e consulta, cu lo defini e tipo di coalicion, ta conoci cu tin conversacionnan avansa tocante e lista unifica.
Roy Barreras a bisa cu e tin un aña ta papia cu e actual lider di e liberalnan, César Gaviria, tocante e tema.
Ta comenta cu ta presidente Juan Manuel Santos esun cu tin e deseo cu e coalicion aki por inclui tambe e partido Cambio Radical, di ex-vicepresidente Germán Vargas Lleras, y cu a yama esaki caba e “ gran reunificacion liberal”, pasobra mayoria di nan ta bin di e cuna liberal.
Sin embargo, Jorge Enrique Vélez, presidente di Cambio Radical, a descarta cu su partido tin na bista pa participa den e coalicion aki cu e liberalnan y ‘la U’. “Nos tin nos propio plannan, nos ta bay elegi un gran cantidad di congresista den henter e pais,” el a sigura.
