Partido MEP: Pa su valioso contribucion na politica di LatinoAmerica y Caribe; Lider di mep ta wordo honra pa kopbal cu e “medalla al mérito”

Ciudad di Mexico, 9 d december 2020- COPPPAL, durante un reunion plenario, a aproba otorgamento di Medalla al Merito 2021 na Lider di Partido MEP y Prome Minister di Aruba, Evelyn Wever-Croes hunto cu tres otro persona den e mundo politico den America Latino y Caribe.

Esaki pa Movemento Electoral di Pueblo, MEP ta un gran y positivo noticia. Den e reunion plenario 2020 dia 27 di november, nos Lider y nos Minister Presidente Evelyn Wever-Croes a ser honra cu e mas halto reconocimento di e organisacion “Honor al Mérito”, cu ta wordo duna na lidernan grandi pa nan valioso contribucion na politica di LatinoAmerica y Caribe. 69 partido politico di 29 Pais miembro di COPPPAL den e regionnan aki a vota pa duna Lider di MEP e honor maximo aki.

Partido MEP ta felicita nos Lider Evelyn Wever Croes, Coleganan di Partido y na e famia grandi di Movemento Electoral di Pueblo cu e gran reconocimento aki.

Sr. Joe Koolman, como representante Internacional pa nos Prestigioso Partido MEP y como Presidente di comision decolonisacion y colonisacion pa COPPPAL y miembro di comisionnan di Calentamento Global y di Agricultura, a expresa: “Ta un gran honor y ta yena mi cu hopi orguyo e gran reconocimento aki na nos gran Lider Evelyn Wever-Croes”.