Manera a bira conoci a traves di e investigacion huicial cu ta tumando den e caso di e fundacion di partido POR, cada fundacion liga na e fraccion di e partidonan politico, ta haya pa cada parlamentario cu tin den nan fraccion, un suma mensual di diezmil florin. E areglo aki tabata existi pa basta aña caba, pero nunca realmente a bira di conocimento publico.

A base di e areglo aki, di cual tin un splicacion separa den e edicion aki, solamente den e ultimo periodo di gobernacion aki e partidonan grandi den parlamento a haya un suma di 9×10.000= 90.000 florin pa aña. Den e periodo di gobernacion aki esey ta acumula na 360.000 florin. E placa aki ta aparte di e placa cu ta ricibi pa paga e colaboradornan di fraccion, dos pa cada fraccion, cu ta ser paga directamente pa gobierno. En total e suma ta yega na mas di un miyon pa aña, incluyendo e costo di salario di e colaboradornan di e fracionnan.

A base di e informacion aki, Bon Dia Aruba ta mira hopi pregunta encuanto e manera con ta atende e asuntonan relaciona cu esaki, manera e forma di responsabilisacion financiero. Entre otro ta e pregunta pakico nunca a anuncia publicamente e areglo aki, cu ta encera un suma considerable di placa publico cu ta bay pa e partidonan cu tin representacion den Staten. Tambe pakico no a considera baha e contribucion na e partidonan den cuadro di e ehercicio di austerisacion cu gobierno tabata obliga di haci aña pasa pa baha gasto en general.

Tambe mester puntra tambe di ki forma e partidonan ta duna cuenta di e placa di subsidio cu nan ta ricibi. For di e texto di e areglo cu nos a ricibi mientras tanto, por constata cu anualmente e fundacion cu ta haya e subsidio mester entrega nan cuenta anual (jaarrekening) traha pa un accountant o un administrador financiero, cerca presidente di Staten. Pero tin e pregunta sin embargo, si e fundacionnan ta someti na control di Algemene Rekenkamer y si no, pakico no. E areglo actual ta bisa cu presidente di Staten ta ricibi e cuentanan anual, y no ta bisa kico e mester haci cu nan, mientras mester tin un instancia di supervision experto den administracion financiero cu mester haci esaki. Un presidente di Staten no ta equipa pa esey; e no tin e apoyo administratio financiero pa haci esey.

Mientras tanto ta importante analisa un poco mas den ki contexto e areglo aki di financiamento di partido politico a surgi varios aña pasa.

Relacion cu ley Hulandes

Desde varios aña gobierno di Hulanda ta enfatisa e importancia di introduci ley cu ta regla y supervisa finanzas di partido politico pa tur parti di Reino.

Mientras otro islanan a pasa nan respectivo ley varios aña pasa caba, na Aruba a tarda te recientemente pa e ley aki pasa parlamento. Di otro banda, a introduci na Aruba varios aña pasa caba, si e parti practico di e ley Hulandes, cu ta contempla e otorgamento di subsidio na partidonan cu tin representacion den parlamento. E filosofia Hulandes tras di esaki ta cu ta mihor pa reglamenta y limita e obtencion di otro fondo pa e partidonan, cu por trece problema di influencia indebido riba operacion di e partidonan den nan trabao legislativo y ehecutivo. Y como compensacion ta duna nan subsidio pa nan por organisa nan mes y nan campañan di mihor manera.

Esaki a sucede na inicio den un areglo no formalisa y na 2010 gobierno di e tempo ey a introduci e areglo, di cual tin un splicacion separa den e edicion aki. Loke no a haci, nunca asina leu cu nos por corda, a publica e areglo aki pa publico en general ta na altura cu nan placa di belasting ta bay tambe na subsidia e partidonan. Por diferencia di opinion si esaki ta algo corecto of no pa haci, pero comunidad mester ta na altura di e areglo aki, tambe pasobra e consecuencianan financiero no ta chikito. Durante actual periodo di gobernacion, mas di un miyon florin pa aña a bay na e subsidio aki.

LEAVE A REPLY

Please enter your comment!
Please enter your name here