Socialite Britanico, Ghislaine Maxwell a ser aresta ayera diahuebs, acusa di yuda atrae tres mucha muhe – esun mas jong di 14 aña di edad – pa nan wordo abusa sexualmente na man di financiero fayeci, Jeffrey Epstein, kende tabata acusa di vicimisa decenas di mucha y muhe durante hopi aña.
Segun e orden di detencion, Maxwell, kende a biba pa varios aña cu Epstein y tabata su compania frecuente durante biahenan rond mundo, a facilita su crimennan y den algun ocasion a join e den abuso sexual di e muchanan.
Epstein, di 66 aña di edad, a tuma su bida den un centro di detencion federal na New York berano ultimo mientras tabata spera su huicio pa trafico sexual.
Maxwell pa hopi aña ta acusa pa varios muhe di actua como madam pa Epstein, yudando e atrae hoben pa abuso, despues contrata nan pa duna masashi, durante cual tabata presiona e hobennan pa participa den actonan sexual. Den un demanda, un muhe a acusa Maxwell di ta ‘e empleado di mayor rango’ den empresa di trafico sexual di Epstein. E acusacionnan aki, te awo, no a resulta den ningun cargo criminal.
Maxwell, di 58 aña di edad, a ser aresta na Bradford, New Hampshire, unda e tabata bibando den un tereno cu matanan cu el a cumpra pa $1 miyon december ultimo. FBI tabata siguiendo e despues cu el a desaparece di bista publico despues di aresto di Epstein un aña pasa.
E orden di aresto tabata inclui cargo di conspiracion pa atrae menornan pa biaha pa participa den actonan sexual ilegal, atraccion di un menor pa biaha pa participa den actonan sexual, conspiracion pa transporta menornan cu intencion di participa den actividad sexual criminal, transporte di un menor cu intencion di participa den actividad sexual criminal. Tambe el a ser acusa di perhurio durante un interogacion den un demanda civil tocante supuesto abuso.
Durante un audiencia breve ayera, hues magistrado a duna orden pa Maxwell keda den custodia mientras e ta transferi na New York pa un audiencia eynan.
E orden di aresto tabata enfoca riba e supuesto abuso di Epstein di tres hoben specifico na su mansion na Manhattan y otro residencianan na Palm Beach, Florida; Santa Fe, New Mexico; y London. No a revela nan nomber den documentonan di corte.
Maxwell ta yiu di un magnate di comunicacion Britanico, Robert Maxwell, kende a muri na 1991 despues di cay for di su yate cerca di Islanan Canario. E tempo ey, e tabata enfrentando acusacion cu ilegalmente el a horta placa di pension di su negoshinan.
Maxwell tabata den un relacion intimo cu Epstein pa añanan y tambe tabata cobra pa maneha su varios propiedad.
