Un empleado di Facebook color scur, uni pa dos otro kende a ser nenga un trabou na e red social, a entrega un demanda contra e compania, bisando cu ta discrimina contra trahadonan color scur y aplicantenan den contratacion, evaluacion, promocion y pago.
Oscar Veneszee Jr. a entrega e acusacion na e Equal Employment Opportunity Commission. Veneszee, kende a traha como operations program manager na Facebook desde 2017 a bisa cu e no a ricibi un evaluacion of promocion husto a pesar di su ‘prestacion exelente’ na e compania. Otro dos a join keho di Veneszee, bisando cu ilegalmente a nenga di duna nan trabou na e compania a pesar di ta cualifica.
Den un declaracion, Facebook a bisa cu ta tuma acusacion di discriminacion hopi na serio y ta investiga cada caso.
Trahadonan color scur ta conta pa 3.8% di empleado di Facebook na Merca y 1.5% di tur trahado tecnico Mericano na e compania. E cifranan aki a cambia masha tiki durante ultimo añanan, un patronchi comun a traves di companianan grandi na Silicon Valley.
Segun keho di Veneszee, entrega ayera, ‘hende color scur y trahadonan color scur den particular ta keda menos representa a traves di tur nivel di Facebook y specialmente na nivel di management y liderazgo. Nan no ta sinti respeta of scucha. Y nan no ta kere cu trahadonan color scur tin un oportunidad igual di avansa nan carera na Facebook’.
