Diasabra a tuma luga firmamento di acuerdo pa deporte entre Minister di Salud Publico, Cuido di Nos Grandinan y Deporte, dr. Carlos “Alex” Schwengle y tur partner di deporte. Hunto a bay di acuerdo pa percura pa deporte bay hunto dilanti y pa e sigui crece pa hubentud y Aruba completo.
E ta un paso hopi grandi y algo historico cu a firma e letter of intent, asina Secretario General di Comite Olimpico Aruba, Nicole Hoevertsz a remarca. E ta expresa e intencion di tur organisacion deportivo pa colabora hunto y traha hunto den e proximo 4 añanan. E letter of intent ta pa trece harmonia, e cooperacion di e diferente organisacion di deporte, Presidente di Aruba Sport Unie, Gerald Franca a remarca. Asina aki nan tur por alcansa tur meta cu tin a tur tipo di deporte y e ta importante pa hubentud di Aruba y en general.
Secretaria di directiva di Lotto pa Deporte, Benvinda de Sousa, a indica cu e partnernan cu a firma e letter of intent lo haci nan maximo esfuerso pa cumpli cu e rekisitonan stipula den dje. E ta un acuerdo entre e partnernan cu nan hunto lo bay coopera den deporte. Tambe pa tin mas transparencia den tur locual ta concerni deporte y actividadnan, structura di e federacionnan envolvi den deporte.
Ta premira cu e partinan cu a firma lo cumpli cu e acuerdo aki y cu nan lo bay haci nan maximo esfuerso pa esaki. Un di e puntonan ta e cooperacion mutuo pa deporte y tambe cumpli cu e good governance principal. Lo percura pa obtene e cifranan manera mester ta y pa ta transparente cu otro.
