E empresa estatal petrolero Venezolano Pdvsa lo opera refineria Isla na Corsou pa un aña mas. Asina portavoz di e compania petrolero estatal dI Corsou, Refineria di Korsou (RdK) lo a declara, segun agencia noticiero Reuters.
E contrato di Pdvsa pa opera e refineria ta vence na fin di e aña aki. E portavoz a describi e acuerdo como un medida di “transicion” pa opera e refineria mientras RdK ta continua cu su esfuerso pa haya un operador nobo.
E refineria di Corsou a anuncia na september cu nan tabatin conversacion avansa cu e grupo Klesch pa opera e refineria. E negociacion cu e grupo aki lo continua, segun e portavoz.
Sali di e refineria na Corsou lo ta un golpi duro pa Pdvsa, cu a mira su produccion collapse cu mas di 50% desde 2016, debi na falta di inversion, mal administracion y ultimamente e sancionnan Mericano cu ta pone presion pa Maduro bandona poder.
Presidente di Pdvsa, Manuel Quevedo, a conversa na juli cu gobierno di Corsou y a mustra interes di Pdvsa pa continua cu operacion di e refineria.
Representantenan di RdK lo a reuni cu Quevedo na Caracas diasabra pasa pa discuti e acuerdo di transicion, e compania a bisa den un comunicado, agregando cu e partidonan a discuti e posibilidad di realisa trabao di mantenimento di e instalacion.
Ni Pdvsa ni ministerio di Petroleo di gobierno di Maduro a responde di inmediato riba solicitud pa comentario.
Na mei gobierno di Merca a emiti un licencia cu ta permiti e refineria di Corsou pa sigui opera cu Pdvsa te januari 2020, a pesar di e sancionnan.
RdK a comunica cu e licencia ta permiti un periodo di transicion adicional di te un aña durante cual e compania por genera entrada necesario pa mantene operacion di refinacion y paga empleado, pero no por genera ganashi.
Nota di redaccion:
Dia 31 di october 2019 ministro di Petroleo di Venezuela, Manuel Quevedo, a manda un carta pa gobierno di Corsou cu e oferta pa keda opera pa un aña mas, garantisando empleo di e mas di 900 empleadonan di e refineria, terminando definitivamente dia 31 di december 2020.
